Тропарь, глас 1-й
Глас апостола Павла услышавша глаголющ: мы юроди Христа ради, рабы Твои, Христе Боже, Пелагия, Параскева и Мария, юроди быша на земли Тебе ради; темже, память их почитающе, Тебе молим: Господи, спаси души наша.
Кондак, глас 8-й
Вышния красоты возжелевша, нижния сласти телесныя тощно оставили есте, нестяжанием суетнаго мира, ангельское житие проходяща, скончавшася, Пелагие, Параскево и Марие блаженныя: Христа Бога молите непрестанно о всех нас.
Молитва Христа ради юродивым Пелагии, Параскеве, Марии Дивеевским.
О, прекрасные невесты Христовы, чистые голубицы позлащенные Духом Святым, собеседницы Ангелом, на земли мысленный рай своими добродетельми насадившия, преподобныя матери наша Пелагие, Параскево и Марие. Что достойное в дар вам принесем, кроме смиренных и грешных молений наших, яже приимше очистите я святыми вашими молитвами и принесите ко Престолу Пресвятыя Троицы. Молите Бога о нас, о блаженныя матери наша, да не яростию Своею обличит нас Господь, ниже гневом Своим накажет нас за премногия грехи наша, но милостию Своею да оградит нас и дарует нам время на покаяние и исправление. О, матери наша Пелагие, Параскево и Марие! Всех собравшихся во святей обители сей осените своим заступлением и испросите у Царя Сил коемуждо благопотребная во временней жизни сей, паче же помозите нам Небесного Царствия достигнути вашими теплыми молитвами и ходатайством ко Господу Иисусу Христу, Емуже подобает всякая слава, честь и поклонение со Отцем и Святым Духом, ныне и присно, и во веки веков. Аминь.
Величание
Ублажаем вас, святыя блаженныя матери наша Пелагие, Параскево и Марие, и чтим святую память вашу, вы бо молите о нас Христа Бога нашего.
Просмотры (4017)
