Служба прпмц. Евдокии, Дарии, Дарии и Марии

НА ВЕЛИЦЕЙ ВЕЧЕРНИ
На Господи, воззвах: стихиры предпразднства 3.
Стихиры святым на 5, глас 1.
Подобен: Небесных чинов:
О, преславнаго чудесе!/ В последняя времена возсиявают мученицы/ и прелести мрак отгоняют,/ вера христианская ныне возвышается и колеблется нечестие,/ радуются вернии/ и праздник новоявленным составляют,/ вопиюще Христу Богу:// мучеников похвала и победа Ты еси, Всесильне.
Оле чудес Твоих, Христе!/ Род немощный ныне восторжествова над начальствы и властьми тьмы:/ новоявленныя страстотерпицы Евдокие, Дарие Дарие и Марие/ древним сопричисляются мучеником/ твердым исповеданием веры,/ доблим терпением мук, знамении же и чудесы./ Темже о них Тебе вопием:// страдальцев похвала и победа Ты еси, Всесильне.
Христа любовию срастворени,/ добропобедныя новомученицы,/ и Сего в себе живуща имеюще,/ вы о Христе пострадаете,/ и Христос в вас и вами пострада,/ яко Глава Церкве члены Своими./ Сего ради честныя мощи ваша/ недугов исцеление бывают,/ имже с верою покланяющеся,/ вопием Укрепльшему вы:// страстотерпцев похвала и победа Ты еси, Всесильне.
Глас 6
Тесный путь преплавающе, от младенчества/ шествовала еси невинным духом/ к жизни вечной ведущим./ В годину лютую от муки геенския многия души спасла еси/ и по смерти в ангельский образ от Жениха Безсмертнаго облечена была еси Евдокие,// и в непрестанной радости воспеваеши воскресшаго Христа.
С мученицею Евдокиею возсияли днесь/ и пострадавшыя с нею:/ приснопамятная Дарие,/ велия подвижнице духом ко Господу горевшая/ и другая Дарие, Иисусову молитву непрестанно творившая,/ Псалтирь единощи во дни неотложно проходившая,/ и Марие смиренная,/ смерть безстрашно приявшая,/ — сии четыре женским немощным естеством/ вся полки демонския мужески на земли победивши,/ точат исцелений струю/ и сердца наполняют богатно благочестивых// Божественною благодатию.
Слава, глас 8:
Ангельское возжелевше житие,/ матери наша Евдокие, Дарие, Дарие и Марие,/ мимотекущее житие сие яко сон вменили есте,/ подвизающеся воздержанием,/ прилежными молитвами,/ пощением, бдением и холодом вольным,/ и чистотою сосуди пречисти явилися есте Святаго Духа/ и неизреченных чудес дар от Бога прияли есте,/ темже молитеся ко Господу,/ мир даровати Российстей земли// и душам нашим велию милость.
И ныне, предпразднства
Вход. Прокимен дне.

Чтения три. Пророчества Исаннна чтение:
Тако глаголет Господь: вси языцы собрашася вкупе, и соберутся князи от них. Кто возвестит сия в них; или яже от начала кто слышана сотворит вам: да приведут свидетели своя, и оправдятся, и да услышат, и да рекут истину. Будите ми свидетели, и аз свидетель, глаголет Господь Бог, и отрок егоже избрах, да познаете и веруете ми, и разумеете, яко аз есмь: прежде мене не бысть ин Бог, и по мне не будет. Аз есмь Бог, и несть разве мене спасаяй. Аз возвестих, и спасох, уничижих, и не бе в вас чуждий. Вы мне свидетели, и аз Господь Бог, и еще от начала аз есмь: и несть от рук моих избавляяй. Сотворю, и кто отвратит то; сице глаголет Господь Бог, избавляяй вас святый Израилев.
Премудрости Соломоновы чтение:
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я, и обрете их достойны себе. Яко злато в горниле искуси их, и яко всеплодие жертвенное прият я. И во время посещения их возсияют: и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: яко благодать и милость в преподобных Его, и посешение во избранных Его.
Премудрости Соломоновы чтение:
Праведницы во веки живут, и в Господе мзда их: и попечение их у Вышняго. Сего ради приимут царствие благолепия, и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы, и яко вихорь развеет их, и опустошит всю землю беззаконие, и злодейство превратит престолы сильных. Слышите убо царие, и разумейте, навыкните судии конце в земли. Внушите держащии множества, и гордящиися о народех языков, яко дана есть от Господа держава вам, и сила от Вышняго.
На литии стихиры, глас 6 Подобен: Все отложше:
Все отложивше/ житейское томление/ и сладость текущую презревше,/ Крест взясте, яко иго Божественное,/ и Христу последовасте,/ и к Небесному покою чудно вселистеся./ О подвижницы и страдалицы блаженнии,/ за Христа тридневная избиения и смерть претерпевшия/ приидите посреде нас невидимо,/ предначинающе торжество и пение/ и сподобляюще даров невещественных// ваш праздник совершающих светолепно.
Глас 8:
Кто изглаголет подвиги и страдания ваша,/ матери блаженыя Евдокие, Дарие, Дарие и Марие,/ кто по достоянию похвалит пощение ваше/ и скудное житие и молитвы непрестанныя,/ удручение тела, страстем противление,/ всенощное стояние, смиренное мудрование/ и яже на демоны победы,/ духовных дарований множество,/ имиже себе предуготовали есте,/ даже до крови и смерти лютыя за Христа пострадати./ Сих ради от Господа яко победителие венчастеся, приснопамятныя,/ молитеся прилежно// о верою чтущих святую память вашу.
Слава и ныне, глас 8:
Приидите людие,/ ублажим Заступницу усердную рода христианскаго,/ се бо предстоит Престолу Царя Славы/ и со слезами молит о земнем уделе Своем./ С Неюже вкупе и Собори святых новомученников вопиют немолчно:/ Владыко Христе, спаси землю Русскую.
На стиховне стихиры, глас 4:
Днесь, вернии, стецытеся/ и общее торжество составите:/ се бо новыя явишася мученицы,/ дщери преподобнаго Серафима нареченныя/ и обитель Дивеевскую еще живи сущи и поныне посещающия,// и молящиеся о спасении душ наших.
Стих: Дивен Бог во святых своих Своих,/ Бог Израилев.
Истины хранительницы/ и устава своего николиже отступающыя/ хлад и голод и бдение всенощное послушания ради терпящия,/ Христа прославили есте во удех своих/ и тридневная избиения от руку мучителей/ понесли есте яко Его честныя язвы/ мученицы Евдокие, Дарие, Дарие и Марие// молите о спасении душ наших.
Стих: В церквах благословите Бога, /Господа от источник Израилевых.
Начальнику мучеников на Небесех предстояще/ с прежде пострадавшими Его ради,/ мученице Евдокие/ в видении скорбящей девице глаголала еси:/ «Плач свой на радость преложи,/ молитву Иисусову в молчании твори непрестанно,/ аз бо посреде Иерусалима Горняго,/ молюся о спасении душ ваших».
Слава, глас 1:
Живуще по смерти, прехвальныя,/ посещаете вся, притекающия к мощем вашим,/ от лютых страстей покрываете всегда/ и от бед избавляете,/ подаваете же исцеления молитвами вашими / и спасаете от демонскаго нахождения/ чтущия святую память вашу,// просяще от Бога даровати прегрешений прощение.
И ныне: предпразднства Тропарь общий, глас 4
Царствия ради Небеснаго/ мир и вся яже в мире оставили есте,/ тесноту совершеннаго послушания возлюбивши,/ дивныя подвижницы и Христа ради мученицы/ в годину лютых испытаний в земли Нижегородстей процветания,/ блаженныя матери наши Евдокие, Дарие, Дарие и Марие,// помяните нас у Престола Пресвятыя Троицы.
НА УТРЕНИ
На Бог Господь тропарь, глас 4 (писан на вечерни).

По 1-ом стихословии, седален, глас 4:
От младенчества Христу себе обручивши,/ мученице Евдокие,/ постом, бдением, веригами железными жестоко плоть свою смирила еси,/ дар предвидения и помощи чудодейственныя еще живе ти сущи стяжавши,/ и по кончине многим являлася еси,/ не оставляющи чад Своих// и всех с верою приходящих к месту страдания твоего.
Слава и ныне:
Иже благодарно воспевати от сердца/ и испросите прилежно, Богородице, Твоя милости, Владычице,/ раби Твои собрашася зовущии и глаголющии:/ Пресвятая Дево, предвари и избави от враг видимых и невидимых и всякаго прещения,// Ты бо еси наше заступление.
По 2-ом стихословии седален, глас 4:
На лютую смерть себе предуготовившия скорбным житием/ мученицы Евдокие,/ Дарие, Дарие и Марие,/ тридневная избиения Христа ради претерпеша/ и в сей день на погосте убиени быша,/ и многы знамения и благоухание и свет явилися суть/ на месте вашего погребения,// да утверждаются колеблющаяся в вере сердца.
Слава и ныне:
Приидите людие,/ ублажим Заступницу Усердную рода христианскаго,/ се бо предстоит Престолу Царя Славы/ и со слезами молит о земнем уделе Своем./ С Нею же вкупе и Собори святых новомученников вопиют немолчно:// Владыко Христе, спаси землю Русскую.
Хвалите имя Господне.
Величание: Величаем вас,/ страстотерпицы святыя мученицы Евдокие, Дарие, Дарие и Марие/ и чтим честная страдания ваша,/ яже за Христа/ претерпели есте.
Псалом избранный: Бог нам прибежище и сила:
По полиелеи Седален, глас 8:
Удивишася мужеству вашему, страдалицы, ангельстии лицы и православных множества:/ како в телеси бреннем женстем страждуще, безплотныя враги победисте/ и благодарственно о вас воспевают Пресвятую Троицу,/ явившую в последняя лета мученицы, древним равночестныя.
Слава и ныне: Богородичен:
Живущим, Госпоже, рабом Твоим в земной юдоли сей/ буди Утешительница,/ отходящим из мира Покровительница / и стоящим на Суде Заступница явися,/ избавляющи нас осуждения/ всемощным Твоим предстательством.
Прокимен: Дивен Бог во святых Своих, Бог Израилев.
Стих: В церквах благословите Бога, Господа от источник израилевых.
Всякое дыхание:
Евангелие: от Марка, зачало 21
По 50 псалме Стихира, глас 6:
Ежелетнюю память днесь/ мучениц Евдокии, Дарии, Дарии и Марии совершающе,/ достойно сия да ублажим./ Тыя воистинну чрез вся блаженства Господня проидоша:/ обнищавше бо духом — обогатишася/ и кротцы бывше — землю кротких наследоваша;/ плакавше — утешишася,/ алкавше правды — насытишася,/ миловавше— помиловани быша,/ чисти бывше сердцем — Бога якоже мощно узреша,/ миротворивше — Божественнаго сподобишася сыноположения,/ гоними же и мучими правды ради и благочестия бывше —/ на Небесех ныне веселятся и радуются/ и прилежно молятся Господеви// помиловатися Отечеству нашему.
Канон, глас 8
Песнь 1
Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.
Духовный лик составльше, вернии,/ славныя страстотерпицы песньми почтим, светильники Церкве,/ озаряющия сердца верою и любовию совершающих память их.
Восхвалим днесь четверицу мучениц славных: блаженную Евдокию, Дарию, Дарию и Марию,/ подвигом и страданием подобниц древним отцем.
В лета, в няже огнь любве ко Христу угасает,/ явистеся, мученицы доблия./ Молитеся, да огнь Божественныя любве ввержется в охладевающая сердца наша.
С лики древних мученик светом Трисолнечнаго Божества облиставаеми, новомученицы,/ предстательством вашим ниспосылаете просвещение поющим вас.
Богородичен: Ты, Благодатная, всех даров полна еси,/ от Пресвятыя Троицы приемлющи сия и раздающи верным,/ теми и всехвальныя мученицы Евдокие, Дарие, Дарие и Марие подвизахуся даже до смерти.
Песнь 3
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
Дивна есть, Христе, держава крепости Твоея!/ Се бо нынешний немощствуяй род, Крестом Твоим вооружився,/ препоясася, якоже древний, силою Твоею/ и сильнаго злобою древняго врага победи.
Воспоим вси мудрую Евдокию, от младенчества крест вземшую и путем ангельскаго жития шедшую,/ и Единому Жениху Небесному уневестившуюся.
Чудесы прослави тя Бог, мученице Евдокие:/ больныя исцеляти, бесы изгоняти, пожара избавляти/ и пророчества дар сподобилася еси прияти от Владыки своего,/ о нас моли чтущих тя.
Кротки и незлобиви во всем житии вашем и послушанию добре навыкли есте, мученицы Дарие, Дарие и Марие, сего ради на Небесех обрели есте покой:/ молите Бога о душах наших.
Богородичен: Жизнь рождшая, Дево Всенепорочная, сердца моего струпы исцели, ходатайствы Твоими/ еже к Сыну Твоему, Богоблаженная.
Седален:
Мирския молвы попрали есте,/ Миродержителю предстоите,/ возлетевше крилы златоукрашенными от трудов, пощения, молитв и страданий,/ матери Богоблаженныя.
Слава и ныне:
Милосердия сущи источник,/ не лиши нас милости Твоея, Богородице,/ но всегда о нас Господа умоляющи с мученицами в земли Нижегородстей просиявшими,/ свободи нас от врагов борющих/ и утверди в Православном благочестии,/ и введи в пристанище небурное спасения душ наших.
Песнь 4
Ирмос: Ты моя крепость, Господи,/ Ты моя и сила,/ Ты мой Бог, Ты мое радоваиие,/ не оставлъ недра Отча/ и нашу нищету посетив./ Тем с пророком Аввакумом зову ти:/ слава силе Твоей, Человеколюбче.
Да жизнь вечную на Небеси улучите и славу первых мученик,/ жизнь и славу привременныя ни во чтоже вменисте, добропобедницы,/ любовию ко Христу горяще,/ Егоже ради и муки всякия претерпесте твердо.
Во дни и в нощи молитвы творяще, ни сна очесем ни веждома своима дремания не давали есте отнюдь,/ хлад и глад вольно претерпевающи, мученицы славныя.
Радуяся терпели есте молвы неправедныя, клеветы и поношения, от человек/ и различныя стреляния вражия, Христа ради Жениха Своего.
Помысливши немощную Евдокию оставити, девица юная сподобилася есть соние видети:/ преподобного Серафима, иже Евдокию и служащих ей дщерями своими нарекл еси.
Богородичен: Подобием иконы Иверския не точию Афон просвещается,/ но и инии гради и веси освящаются,/ от тоя чудесную помощь приемлюще и источник утешения в ней обретающе,/ и нам, Благая Вратарнице, двери райския отверзи.
Песнь 5
Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.
Пресветлая твоя память простирается в мире и просвещает человеческие души Светом благодати,/ юже совершающих любовию, от бед нас избави, молимся, мученице Евдокие.
Жениха временнаго не восхотела еси видети, мученице Дарие,/ избиение от сродник претерпела еси и до смерти единому Господу дух горящий возносила еси.
В сердце своем храмину благоуханну стяжавши, мученице Дарие, другая,/ смирения совершеннаго и подвига непрестаннаго нам образ явилася еси.
Святитель Николай трикраты явися ти,/ на подвиг странничества первее, послежде в келию к блаженной Евдокии, благословляя тя,/ мученице Марие, славная.
Богородичен: Радуйся, Приснодево, златая мысленных аромат кадильнице,/ в нейже положися Небесный фимиам — Христос,/ облагоухаяй притекающих к Тебе, Богородице.
Песнь 6
Ирмос: Молитву пролию ко Господу/ и тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.
Четверочисленный страстотерпиц лик нам возсия от земли Нижегородстей,/ якоже звезды на церковней честней тверди, верныя просвещаяй и прелести тьму разгоняяй.
Болезнию неизлечною и подвиги первее победивши страстей привозстания,/ второе посрамила еси державу злочестивых, Евдокие, мученице,/ пострадавши крепчайше.
Да похвалим с Евдокиею Дарию славную, Дарию и Марию послушанием и терпением просиявших,/ Христова винограда доброплодныя розги.
Яко цвети прекраснии показастеся посреде сродник своих,/ вонями подвиг ваших благоухающи,/ и обвеселяете душевныя чувства лобызающих мощи ваша.
Богородичен: Помощницу сильну ведуще Тя, Всеблагая,/ моление Тебе приносим от всея души:/ вонми и услыши ны, Владычице,/ и избави всякаго гнева и прещения Божия рабы Твоя.
Кондак, глас 6
Житием праведным к достойному приятию мученичества себе уготовившия/ без боязни тридневная избиения и смерть претерпели есте,/ Невесты Христовы предивныя,/ блаженныя Евдокие, Дарие, Дарие и Марие,/ ныне многими чудесы и исцелении просиявшия,/ не оставите землю Русскую/ без покаяния погибнути.
Икос
Приидите монашествующих сословие,/ приидите чистоты рачитилие,/ приидите празднолюбцы, всяк возраст,/ песньми духовными похвалим наших молитвенниц,/ в них имуще постников похвалу,/ печальных утешительниц,/ недугующих неизлечно посетительниц и сущим в бедах скоропослушных помощниц,/ точащих всем исцеления обильно и всякое прошение исполняющих,/ и возопием: не оставите землю Русскую/ без покаяния погибнути.
Песнь 7
Ирмос: От Иудеи дошедше, отроцы/ в Вавилоне иногда/ верою Троическою пламень пещный попраша, поюще:/ отцев Боже, благословен еси.
Воистину вконец побежден бысть вами враг,/ землю и море хваляйся ниспровергнути,/ ногами бо вашими попрасте того, непобедимыя,/ Христа в себе имуще.
Влекомы на заколение, вопрошаху страстотерпицы:/ Христа исповедахом Бога и тем ложь вашу обличихом,/ за кое беззаконие без суда хощете нас убита?/ Но обаче узрите нас, во славе Небесней сияющих.
Беззакония лютая творяще безбожнии и ненавистозлобнии/ подвижниц Христовых тщащиися убита, иконы ногами попираху,/ и тогда от иконы Иверския Божия Матери свет возсия неизреченный.
Во огни мук, страстотерпицы тридневная избиения терпяще и поругания и злохуления,/ яко злато, искуси вас Господь/ и, яко всесожжение тучно, прият,/ общниц страстей Своих явив вас, всеблаженныя.
Богородичен: Бога Отца Дщерь явилася еси, Марие,/ Сына же Матерь, Приснодево,/ Невеста же Духа Святаго Пречистая,/ селение Светоначальныя Троицы,/ всего Божества храм одушевлен.
Песнь 8
Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.
Согласно мучениц Марию, вернии, и Дарию, Дарию с блаженною Евдокиею воспоим,/ яко низложительниц врага и Невест Христовых, емуже вопием: вся дела Господня, благословите Господа.
Просвещся страданий светлостию и благодатию Христовою убелена, паче всякия белезны земныя,/венценосица Господу предстоиши со страдавшими с тобою, славная,/ воспевающе, Евдокие: вся дела, благословите, пойте Господа.
Святыя Тайны Христовы в день кончины сподобилися есте прияти от руку иерея Василиа/ и тако от Господа укрепляеми мужески на смерть потекли есте поюще: вся дела, благословите, пойте Господа.
Свыше назирающе, венценосицы славныя, память вашу совершающих,/ ходатайствуйте у Всевышняго Дароподателя временная и вечная благая нам, зовущим: вся дела благословите, пойте Господа.
Богородичен: Кадильница явилася еси пророку,/ Божественнаго Угля сущи, греха отъемлющаго,/ Богородице Дево, мати Бога нашего.
Песнь 9
Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.
Днесь земля Нижегородская вашу память празднует:/ сей бо явистеся столпи и Божественная забрала, и утверждение, молитвенницы и заступницы наши Богоблаженныя.
Николиже оскудеваше помощь твоя, мати наша Евдокие,/ всем просящим и страданием Твоим покланяющимся.
Предограждение ныне весь сия стяжа, святых честныя мощи,/ и врачевание безмездно храм, идеже верою всяк притекаяй болезней и страстей свобождается.
Триипостасный Боже наш,/ новых мучениц Твоих приемый подвиги и преславно увенчавый их,/ тех предстательством спаси рабы Твоя/ и сподоби ны вечно славити Державу Твою.
Богородичен: Поими, Дево, к Сыну Твоему новых мучениц лик четверочисленный/ и с ними помолися,/ яко да несветимаго огня избавльшеся,/ Царствия Небеснаго сподобимся.
Светилен:
Приими, о, Троице покланяемая, новыя мученицы,/ Евдокию блаженную, Дарию, Дарию и Марию, яко жертвы совершенныя, яко благовонныя фимиамы, яко мира многоценная,/ и их молитвами нам подаждь прегрешений всех прощение.
Слава и ныне: предпразднства

На хвалитех стихиры, глас 2 Подобен: «Егда от древа»
Приидите, мучениколюбцы вси,/ воспоим новомученицы Христовы, Евдокию, Дарию, Дарию и Марию,/ сии бо явишася в последняя лета/ слава и утверждение Православныя веры,/ теплыя предстательницы наши,/ немощствующих врачеве изряднии,/ скорбящих утешение,/ и молятся о еже спастися нам.
Приидите, Безплотных лицы,/ во плоти сущим спразднуйте нам/ в честней памяти страстотерпиц:/ сия бо, тело немощное носяще,/ яко безплотнии, Христа ради подвизашася,/ о лютых муках нерадивше,/ с нимиже молитеся,/ о еже спастися нам.
Приидите мучеников множества,/ приветствуйте ныне друг друга:/древнии — новых,/ соименнии — соименных,/ подобнии — подобных,/ срадующеся вкупе вси/ в неизреченней славе Небесней/ и молящеся, о еже спастися нам.
Слава, глас 5 Подобен: «Радуйся Живоносный Кресте:»
Радуйся, преславная Нижегородская страно,/ ликуй, в Бозе торжествующи,/ тебе бо дадеся многоценное сокровище,/ лик четверочисленный новомучениц украси тя:/ Евдокия, Дария, Дария и Мария,/ их бо предстательством чудес подавается множество,/ верныя люди укрепляют на враги противныя видимыя и невидимыя,/ духом же предстояще у Владычня Престола,// молятся спастися душам нашим.
И ныне, предпразднства
На литургии
Блаженна песни канона 3 и 6
Прокимен, глас 4: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Апостол к Коринфянам, зач. 181
Аллилуиа, глас 4: Терпя потерпех Господа и внят ми- и услыша молитву мою.
Евангелие Марка зач. 21
Причастен: Радуйтеся праведнии о Господе:
Молитва
О! дивныя подвижницы и заступницы нашя мученицы Евдокие, Дарие, Дарие и Марие,  древних отец подражательницы истинныя,  в тесноте послушания без разсуждения, бдения недобровольнаго и поста изнурительнаго пожившия — ныне к вам прибегаем и к мощем вашим припадающе молим вас: о, страстотерпицы святыя, незлобивыя агницы, своею кровию Христа ради обагренныя и жестокими предатели тридневно мучимыя и закланныя; о, прозорливицы, многия души от гибели вечныя исхитившия и о страданиях прежде кончины от Господа извещенныя; о,  исцелительницы и чудотворицы не токмо в земли Нижегородстей, но и во всей стране Российстей просиявшия, не оставите нас во грехах и беззакониих погибнути, но помозите в покаянии истиннем житие наше скончати, славяще Святую Троицу Отца и Сына и Святаго Духа во веки веков. Аминь.
Поучения мученицы Евдокии по 6 песни
Дуня говорила: есть пост не в пост, и молитва не в молитву, и послушание не в послушание; если постишься, то и мягкий ржаной хлеб не ешь, и досыта не вкушай. Если ты день не ешь, а на другой день приготовишь себе хорошую пищу, такой пост Бог не примет. Если ты молишься для людей, чтобы тебя люди видели, а на душе у тебя этого нет, это не молитва. А послушание, если ты исполняешь его так, что тебе легко и подходно, это не послушание, а то послушание принято у Господа, которым Бог благословит.
Она говорила: человек спасения ищет, а спасение—человека. Друг к другу идут и друг друга не найдут. Она говорила: кто больного жалеет, тот крест должен нести.
Если нет скорби при подвиге, и если тебя только все ублажают и чтут, не доходен подвиг твой ко Господу, если же подвиг ради Бога, то будет скорбь непременно, если враг побежден, он будет действовать через человека.
Очень велела охраняться тайноядения. Она так говорила: от него корень злобы вырастает, человек все равно что змею глотает, за непослушание Господь попускает болезни. Поля однажды на яблоко соблазнилась и его припасла; думает: «Воды принесу, самовар поставлю и поем», — а Дуня уже велит его обратно положить. Поля плакала, просила дать, а она не дала. «Прибавь, — говорит, — поста и молитвы. Господь будет всего посылать в изобилии, и не съесть тебе. Чем больше поста и молитвы, тем больше Господь будет всего посылать». Когда ей Царицу Небесную принесли, тогда из разных губернии потек к ней народ. Девушки начали плакать: «Бог нам посылает столько милостыни, куда нам ее деть, нам все равно не даешь». А Дуня сказала: «Злитесь, на вашу злость Г осподь еще больше пошлет, если бы не на пользу, разве бы Царица Небесная послала мне всего столько?» В сенях было как склад: хлеб белый, рыба в коробках, мед, варенье— и все это раскрыто, и никто до этого не дотрагивался. А деньги по полу валялись, и по ним ходили. Дядя Дунин по старости последнее время совсем не слезал с печи; попросит он пить, а они говорят: еще рано, а уже вечер; подадут ему хлебца—и ладно. Ему было видение, как солдаты потащат все в разные стороны.
Дуня поучала девство хранить. Это говорила она монастырским людям. Она тело свое не велела показывать и в баню не благословляла со всеми ходить, а холодной водой мыться. В пище советовала воздерживаться, руку не позволяла давать, кроме как под благословение подходить. На мужчин возбраняла смотреть, а смотреть вниз. По кельям она тоже не разрешала ходить. Монах выйдет из кельи— в келью войдет не такой. Чтить начальников надо монастырским людям. К службе наказывала ходить неопустительно, в нечистоте не позволяла ходить до шести дней. Плакала, кто стрижет волосы из монашествующих. За трапезой не разрешала говорить ни слова, и все везде и всегда ограждать крестным знамением поучала она монастырских людей. И одеваться, и обуваться, и спать ложиться — ограждать и окна, и двери — это и мирским — и скотину ограждать вечером и утром. Не разрешала часто посещать женские монастыри монахам и наоборот. Строго запрещала переходить из обители в обитель. Какой Бог крест послал, терпи. Дуня и материально монастырских поддерживала. Она особенно любила монастырских людей и духовенство. Я, говорит, их считаю как ангелов. Приходили к ней со слезами; от нее никто не уходил неутешенным.

Добавить комментарий

Ваш e-mail не будет опубликован. Обязательные поля помечены *