Молитвословия преподобным Александре, Марфе, Елене Дивеевским

8c28b17627d34a6292a5b154719b1e3313/26 июня

Тропарь прп. Александре Дивевской, глас 5:

Образ Христова смирения являющи, великая и святая жено, преподобная мати Александро, слез источник непрестанный соделалася еси, молитву в Богу чистейшую, любовь ко всем нелицемерную и изобилие благодати Божия стяжала еси, благословение Царицы Небесныя, об основании Четвертаго Ея Жребия во вселенней исполнивши; восхваляем тя с преподобным Серафимом, емуже и попечение об обители сей заповедала еси, и лобызающи стопы твоя смиренно молим тя: помяни нас у Престола Божия.

Кондак преподобной Александре Дивеевской, глас 3:

Воспоим днесь Пресвятую Деву, явившую в России первоначальницу последняго Удела Своего во вселенней, преподобную матерь нашу Александру, да ея молитвами Господь подаст нам грехов прощение.

  Молитва преподобной Александре Дивеевской:
О, святая угоднице Божия преподобная мати наша Александро! Приими недостойныя молитвы наша, с пламенною верою к тебе возносимыя, и помози нам христианския добродетели стяжати, веру крепкую и любовь к Богу и к ближним имети, крест скорбей и болезней терпети. О, госпоже наша и мати! Прости, благослови, помолися за нас, да и мы будем прощены, яко ты прощена, и помяни нас у Престола Божия, да твоими молитвами спасаеми в нынешнем веце и в будущем, удостоимся хвалити и воспевати Всесвятое Имя Отца, и Сына, и Святаго Духа во веки веков. Аминь.

31175384421 августа/3 сентября

Тропарь преподобной Марфе Дивеевской, глас 2:

Равноангельное житие стяжавшая, дивная отроковице и собеседнице преподобного Серафима, госпоже и мати наша Марфо, ныне в мощах почиваеши и у Престола Божия предстоиши, моли о нас милостиваго Бога, Небеснаго Дивеева начальнице.

Кондак преподобной Марфе Дивеевской, глас 8:

Небесною кротостию, молчанием и неземною радостию исполнилася еси, юная и невиданная доселе в Дивеее отроковице, преподобная мати наша Марфо, в великую схиму от преподобного Серафима облеченная; темже водворилася еси с мудрыми девами в Небесном чертозе и со Ангелы Всецарю непрестанно предстоиши.

Молитва преподобной Марфе Дивеевской:
О, богомудрая и дивная отроковице, сосуде благодати Божия, в простоте голубиной пожившая, кротостию небесною, чистотою и послушанием просиявшая, сотаиннице преподобнаго Серафима, Небеснаго Дивеева начальнице, госпоже и мати наша Марфо, буди любящим и чтущим тя ходатаица спасения, в страсе Божием нас утверди, да горняя мудрствуем, а не земная, изнемогающия силы наша на бодрость премени, в любве и единомыслии укрепи и помяни нас, грешных, у Престола Божия во Царствии Небеснем.

prp_Elena28/10 июня

 Тропарь преподобной Елене Дивеевской, глас 1:

Добродетельми кротости, смирения и воздержания просиявшая, таинственная начальнице Мельничныя общины в Дивееве явилася еси, преподобная мати наша Елено, даже до смерти в совершенном послушании старцу Серафиму пребыла еси и Господа лицезрети сподобилася еси, испроси и нам дерзновение Ему Единому служити во спасении душ наших.

Кондак преподобной Елене Дивеевской, глас 5:

В монашестве благочестно поживши и в юных летех путь свой скончавши, послушанием, постом и молитвою вечно неразлучною в сретению Жениха себе предуготовившая, богомудрая Елено, молим тя: от бед избави нас твоими молитвами, блаженная.

Молитва преподобной Елене Дивеевской:
О, преславная мати, скорая наша помощнице и заступнице и неусыпная о нас молитвеннице! Предстояще раце мощей твоих и на сия со умилением, яко живей ти сущей, взирающе, молимся тебе усердно: приими прошение наше и принеси я ко престолу милосердаго Отца Небеснаго; яко дерзновение многое к Нему имущая: испроси притекающим к тебе и всем православным христианом вечное спасение и временное благоденствие, на вся же благая дела и начинания наша щедрое благословение и от всяких бед и скорбей скорое избавление. Ей, чадолюбивая мати наша! Тебе, предстоящи престолу Божию, ведомы суть нужды наши духовные и житейские: призри на ня матерним оком, и твоими молитвами вся злая от нас отврати, паче же злых и богопротивных обычаев умножение: утверди же во всех веры согласное ведение, взаимную любовь и единомыслие, да во всем житии нашем, словесы же и писании и дёлы, славится всесвятое имя Отца и Сына и Святаго Духа, Единаго Бога, в Троице покланяемаго, Ему же честь и слава во веки веков. Аминь.

Тропарь преподобным Александре, Марфе и Елене  Дивеевским, глас 4:

Явилися есте земли Российския украшение, начальницы обители Дивеевския, преподобныя матери наша Александро, Марфо и Елено, благословение Царицы Небесныя исполнившия и дерзновение ко Господу стяжавшия, молите у Престола Пресвятыя Троицы о спасении душ наших.

Кондак преподобным Александре, Марфе и Елене  Дивеевским, глас 8:

Дивеевстия светильницы всесветлыя, преподобныя матери наша Александро, Марфо и Елено, в пощении, бдении, молитве и трудех добре подвизалися есте и по смерти нас освящаете чудес источеньми и исцеляете недугующих души; молите Христа Бога грехов оставление даровати любовию чтущих святую память вашу.

Молитва преподобным Александре, Марфе и Елене  Дивеевским:

О, преподобныя матери наша, Александро, Марфо и Елено, аще и скончали есте жизнь свою телом, но духом не отступаете от нас, руководствуете и наставляете шествовати по заповедем Господним и носити крест свой и последовати Владыце Христу Богу нашему. Вы, преподобныя, вкупе с преподобным и богоносным отцем нашим Серафимом, Саровским чудотворцем, имеете дерзновение ко Пресвятей Троице и Пречистей Деве Марии. Будите молитвенницы о нас недостойных, жительствующих во святей обители сей, ей же вы и начальницы. Будите помощницы и заступницы всем приходящим с верою и ко святым мощам вашим припадающим, да, вашими молитвами сохраняеми, невредими от всякаго зла пребудем, славяще Святую Троицу, Отца, и Сына, и Святаго Духа, ныне и присно и во веки веков. Аминь.

Добавить комментарий

Ваш e-mail не будет опубликован. Обязательные поля помечены *