Служба прп. Александре Дивеевской

На малой вечерне:

На Господи, воззвах: стихиры на 4, глас 6

Приидите, вернии людие, во святую обитель Дивеевскую, иже Четвертым Жребием Божия Матере нарицается,/ ублажим верную рабу Владычицы Пресвятыя Богородицы/ Александру преподобною, начальницу святаго места сего/ и, припадающе к честным и многоцелебным ея мощем,/ яко заповеда преподобный Серафим, усердно молимся://Помяни нас, госпоже и мати наша,// у Престола Божия во Царствии Небеснем. (Дважды)
Кая духовная пения/ принесем ти, преподобная Александре,/ яко явлением Тебе Царицы Небесныя/ Дивеево дивно освятися и Четвертым Жребием Ея наречеся./ Ты же, мати наша первоначальнице,/ многими труды и терпением/ в слезном покаянии основание обители положила еси/ и, благодать Духа Святаго стяжавши,/ ныне в Небесных Чертозех ликуеши.// Молися о спасении душ наших.
Киими недостойными усты/ восхвалим преславную матерь нашу Александру,/ милостивую покровительницу, теплую и скорую помощницу,/ любовию своею нас согревающую/ и радости тихой исполняющую/ притекающих к раце мощей ея// и подающую усердно просящим мир и велию милость.

Слава, глас 4

Благодарственная воспоим дивному во святых Христу Богу нашему,/даровавшему нам матерь предобрую,/ мудрую наставницу и чадолюбивую,/ церковных уставов твердую хранительницу, непорочное житие совершившую// и ныне в лице жен преподобных просиявшую.

И ныне, глас 4 Богородичен:

На стиховне, стихиры, глас 1. Подобен: Небесных чинов

Велия подвиги твоя и труды/ како прославим мы, недостойнии,/ обители Дивеевския основательнице,/ преподобная Александро блаженная,// за чтущия тя помолися.
Великий ангельский образ восприявши/ и послушание Царицы Небесныя исполнивши,/ душу святую в руце Божии вверила еси/ и ныне с лики жен преподобных// чисте зриши Святую Троицу.
Великую благодать и дар исцелений/ еще живей ти сущи стяжавши,/ Александро преподобная,/ с любовию притекающим к раце мощей твоих// вся прошения исполняеши.

Слава, глас 6

Воспоим вернии/ еже о нас Божия Матере благоволения величие,/ яко, прославляющи различными чудесы вся Жребия избранная Своя,/ дарова и обители сей знамение/ Своего всеблагаго о нас попечения,/ и тако Дивеево, еже бяше неславно и ненаселённо иногда,/ послежде явления Царицы Небесныя/ первоначальнице преподобной Александре/ просия благодатию Господа нашего Иисуса Христа,/ и сотворися место радости духовныя/ и покаяния истиннаго,// просвещающее всякаго человека.

И ныне, глас 6 Богородичен:

Тропарь, глас 5:

Образ Христова смирения являющи, великая и святая жено/ преподобная мати наша Александро,/ слез источник непрестанный соделалася еси,/ молитву к Богу чистейшую, любовь ко всем нелицемерную/ и изобилие благодати Божия стяжала еси,/ благословение Царицы Небесныя/ об основании Четвертаго Ея Жребия во Вселенней исполнивши;/ восхваляем тя с преподобным Серафимом,/ емуже и попечение об обители сей заповедала еси,/ и, лобызающе стопы твоя, смиренно молим тя:// помяни нас у Престола Божия.

Слава, и ныне, Богородичен глас 5

Радуйся, двере Господня непроходимая;/ радуйся, стено и покрове притекающих к Тебе;/ радуйся, необуреваемое пристанище и Неискусобрачная,/ рождшая плотию Творца Твоего и Бога,/ молящи не оскудевай о воспевающих/ и кланяющихся Рождеству Твоему.

НА ВЕЛИЦЕЙ ВЕЧЕРНИ

Блажен мужНа Господи, воззвах: стихиры на 8, глас 1

Приидите, вернии людие,/ во святую обитель Дивеевскую/ воспети собеседницу чудную Ангелов/ и человеков помощницу неоскудевающую,/всечестную Александру,/ первоначальницу святаго места сего,/ иже процвете во благоухании святости ея жития,/ горькое и терпкое яже ко спасению избравшую,/ ныне Христу во славе предстоящую// и молящуюся о спасении душ наших.
О, преподобная мати наша Александро,/ Божественною просветившися благодатию,/ мятеж мира и житейскую печаль отвергла еси,/ евангельски Христу последовавши./ Его же неизреченную возлюбивши нищету,/ предпочла еси путь тесный нежели пространный/ и Обрадованной и в молитвах неусыпающей Богородице/ добродетельми послужила еси неустанно./ Темже и обители Ея явилася еси первоначальница/ и нам небесная наставница.// Помяни нас у Престола Божия во Царствии Небеснем.
Вся преславныя глаголы Царицы Небесныя в сердце слагающи,/ мати наша Александро,/ богомудро на земли пожила еси,/ устроению обители доброе начало положила еси,/ в покаянии слезном и молитве непрестанной/ благодать Святаго Духа стяжала еси./ Молися ко Господу,/ яко имееши дерзновение,// да помилует души наша.
Отверглася еси мира и сущих в мире,/ Александро блаженная,/ и образ Ангельский восприяла еси,/ благословение Царицы Небесныя исполнила еси,/ храмы многия воздвигла еси,/ николиже сирыя, нищия и в бедах сущия оставляла еси/ и жестоко плоть свою смирила еси./ Темже, на Небесех водворившися,/ чисте зриши Святую Троицу./ Испроси нам велию милость, да и мы всегда с Господем будем.

Глас 7

Надеющимся на Господа разумеют истину/ и вернии в любви пребудут Ему.
Тако ты, мати Александро, благодатию сияющи, светом Евангелия тьму неразумия отгнала еси:/ уставы церковныя твердо хранящи,/ истины веры православныя людем уясняющи./ В житии твоем скорбнем усмотряющи изволение Божие,/ в благодарении Господу николиже оскудевала еси;/ кротостию и смирением вся удивляла еси./ Молися Христу Богу о любовию чтущих тя.
Кто доволен достойно воспети подвиги твоя, труды и болезни,/ преподобная мати наша Александро./ Како в тесной келлии пред Распятием со слезами нощию молилася еси,/ и на камень главу твою полагала еси,/ и одеждею ветхою в зной и стужу покрывалася еси,/ научи и нас по Апостолу жити,/ ведущи Единаго Христа и Сего распята,/ и в покаянии истиннем житие скончати,// и сподобигися Царствия Небеснаго.

Глас 8

Ублажаем тя по долгу, мати Александро,/ похвалу нашу и во плоти Ангела,/ житие бо твое частно и успение со святыми,/ просияла еси делы благими:/ весь сию смертоноснаго глада избавила еси,/ кладезь воды целебныя своима рукама ископала еси,/ бедныя невесты одаровйла еси,/ многия люди ко Христу привела еси./ Темже припадающе к раце мощей твоих/ со умилением просим,// да подаст нам Господь тобою велию милость.
Преподобный Серафим свидетельствова о тебе,/ Александро блаженная,/ яко ты еси велия раба Божия,/ просиявшая смирением неисповедимым,/ любовию ко всем нелицемерною/ и молитвою чистейшею./ И ныне обители твоея щит крепок/ противу стреляния вражия видим тя,/ предстательством бо твоим искушение всякое побеждается// и очищаются души наша.

Слава, гл. 6   

Приидите, верни и людие, во святую обитель Дивеевскую,/ иже Четвертым Жребием Божия Матери нарицается,/ ублажим верную рабу Владычицы Пресвятыя Богородицы/ Александру преподобную,/ начальницу святаго места сего,/ и, припйдающе к ея честным и многоцелебным мощем,/ яко заповеда преподобный Серафим,/ усердно молимся:// помяни нас, госпоже и мати наша,// у Престола Божия во Царствии Небеснем.

И ныне, Богородичен, глас 6

Кто Тебе не ублажит, Пресвятая Дево?/ кто ли не воспоет Твоего Пречистаго Рождества?/ безлетно бо от Отца возсиявый Сын Единородный,/ Тойже от Гебе, Чистая, пройде,/ неизреченно воплощся:/ естеством Бог Сый/ и естеством быв Человек нас ради;/ не во двою лицу разделяемый,/ но во двою естеству/ неслитно познаваемый./ Того моли, Чистая Всеблаженная,/ помиловатися душам нашим.

Вход. Прокимен дне.

Премудрости Соломоновы чтение (Глава 3)

Праведных души в руцё Божией, и не прикоснется их мука. Непщевани быша в очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказане бывше, великими благодётельствовани будут, яко Бог искуси я, и обрете их достойны себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющимся Нань разумеют истину, и вернии в любви пребудут Ему: яко благодать и милость в преподобных Его, и посещение во избранных Его.

Премудрости Соломоновы чтение (Главы 5 и 6)

Праведницы во веки живут, и в Господе мзда их: и попечение их у Вышняго. Сего ради приимут царствие благолепия, и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменомётныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихорь развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех языков, яко дана есть от Господа держава вам, и сила от Вышняго.

Премудрости Соломоновы чтение (Главы 4 и 5)

Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долго: угодно бо бе Господеви душа его. Сего ради потщася от среды лукавствия. Людие же видевше, и не разумеете, ниже положше в помышлении таковое: яко благодать и милость в преподобных Его, и посещение во избранных Его.

На литии стихиры, глас 6

Егда, мати Александро преподобная,/ приближися время скончания твоего/ и уразумела еси духом твое ко Господу отшествие,/ тогда со слезами помолилася еси/ об обители твоей и сестрах твоих/ и вся нужная ко спасению им завещала еси,/ попечение об обители на преподобнаго Серафима возложивши./ В час кончины Святых Таин Христовых причастилася еси,/ и молитве бывшей на устех твоих/ и иконе Пречистыя Богородицы на персех твоих,/ предала еси душу твою в руце Господеви./ Тому убо молися/ не лишеным быти и нам кончины благия/ и наследия Небеснаго.

Глас 8

Откуду мне сие,/ да прииде Мати Господа моего ко мне?/ — взывала Предтечева мати пришедшей Богородице в дом Захариин,/ сице первоначальница обители Дивеевския преподобная Александра,/ приемлющи обетования вечная об обители сей/ от Пресвятыя Девы/ и с ними богатство Небесных дарований/ от Сына Ея Единороднаго Господа нашего Иисуса Христа,/ от неописанныя радости недоумевала еси:/ како исполнити слово сие./ Наипаче мы, недостойнии,/ киими благохвалении возвеличим Царицу Небесную,/ даровавшую нам таковую ходатаицу/ и наставницу, всеблаженную Александру,/ и откуду нам сие яко Пречистыми стопами касашеся земли, Четвертым Жребием Ея нареченныя,// подающи нам мир и велию милость.

Слава, глас 4

Воспоим вернии/ еже о нас Божия Матере благоволения величие,/ яко, прославляющи различными чудесы вся Жребия избранная Своя,/ дарова и обители сей знамение/ Своего всеблагаго о нас попечения;/ и тако Дивеево, еже бяше неславно и ненаселённо иногда,/ послежде явления Царицы Небесныя первоначальнице преподобной Александре/ просия благодатию Господа нашего Иисуса Христа,/ и сотворися место радости духовныя и покаяния истиннаго,// просвещающее всякаго человека.

И ныне, глас той же

Воспоим неусыпающую в молитвах Богородицу/ и, с сердечной верой к Ней притекающе,/ потщимся подражати Ей в милосердии и кротости,/да обрящем Ея заступлением// милость у Христа Бога нашего.

На стиховне стихиры, глас 2 Подобен: Мира красоту:

Егда Божественное звание/ достиже тя, преподобная мати Александро,/ тогда славу рода твоего и имения оставивши,/ во обитель Флоровскую пришла еси/ и жестоко житие пожила еси,/ в молитве и трудех Господеви угождающи./ Темже молися Христу Богу// спасти и просветити души наша.

Стих: Дивен Бог во святых своих, Бог Израилев.

Егда Божественная благодать исполни сердце твое,/ тогда явися ти Пресвятая Дева/ Царица Небесе и земли,/ повелевающи град Киев оставити/ и обитель на севере России устроити,/ да славится в ней от человек имя Христа Бога,/ Емуже молися, мати Александро,// низпослати нам велию милость.

Стих: Честна пред Господем смерть преподобных Его.

Егда благодать Святаго Духа тя осени, мати преподобная,/ и Матерь Божия явися ти на пути во обитель Саровскую,/ тогда со страхом и многими слезами/ вселилася еси в Дивееве, Ею возлюбленном,/ и в тесной келлии молилася еси,/ примером своим и нас поучающи/ и наставляющи благоугождати Христу Богу./ Тому молися у Престола Пресвятыя Троицы// да спасет и просветит тебе ради души наша.

Слава, глас 4

В честнем прославлении твоем,/ преподобная мати Александро,/ верныя благодатно озаряеши/ и недуги человеческия безмездно врачуеши./ Темже, с любовию припадающе к раце мощей твоих,/ умильно глаголем:/ настави ны ходити путем подвигов твоих/ и молитвами твоими соделай нас причастники быти Царствия Небеснаго.

И ныне, глас 4 Богородичен:

Призри на моления Твоих раб, Всенепорочная,/ утоляющи лютая на ны востания,/ всякия скорби нас изменяющи,/ Тя бо Едину твердое и известное утверждение имамы/ и Твое предстательство стяжахом,/ да не постыдимся, Владычице, Тя призывающии,/ потщися на умоление Тебе верно вопиющих:/ радуйся, Владычице,/ всех помоще, ра’досте и покрове,/ и спасение душ наших.

НА УТРЕНИ:

Тропарь святыя, глас 5, (дважды) Тропарь писан на малой вечерни

Слава и ныне, Богородичен, глас 5

По 1-м стихословии, седален, глас 4

Всем сердцем своим, всею душею и мыслию Бога возлюбившая,/ мати Александро,/ в Дивееве первоначальница молитвы на мысленной Голгофе явилася еси/ и дар благодатных слез стяжавшая,/ непрестанно в созерцании Господа пребывала еси./ Научи и нас присно глаголати:// Господи Иисусе Христе, Сыне Божий, помилуй нас грешных.

Слава и ныне, Богородичен:

Удивишася, Чистая, лицы Ангельстии,/ како Причастница сущи богатейшия радости Небесныя,/ во юдоли скорбей человеческих присно пребываеши,/ и ко всякому воплю молитвы матерски тщишися,/ и благодать раздаеши неиждиваемую,/ больных исцеляющи и печальных утешающи, Дево Мати Господня,/ сокровище пространнейшее милости Божественныя.

По 2-м стихословии седален, глас 8

Страстотерпец Царь Николай ревноваше о прославлении твоем,/ мати Александро,/ в царских чертозех бо многащи являлася еси,/ чудесы и исцелении вся удивляющи./ Сего ради вопием ти:// моли, преподобная, с Царственными страстотерпцы Христа Бога спастися нам.

Слава и ныне, Богородичен:

О Тебе радуемся и Тя прославляем, Дево Пречистая,/ яко Невместимаго вместила еси,/ Егоже присно моли о спасении нашем.

Величание:

Ублажаем тя, преподобная мати наша Александро, и чтим святую память твою, ты бо молиши о нас Христа Бога нашего.

По полиелеи Седален, глас 1

Пресвятая Дева Богородица/ дивно управи отшествие твое от жития сего временнаго,/ преподобная Александро,/ в схиму бо великую облеченная,/ в час кончины Святых Таин Христовых приобщилася еси./ Икону Ея Казанскую на перси возложивши,/ душу святую в руце Божии предала еси// и ныне с лики жен преподобных чисте зриши Святую Троицу.

Слава и ныне, глас 3

Притецем вси, ведущии Бога,/ к Небесней Царице и Матери всех,/ прославляюще Ея снисхождение к роду нашему,/ и в избранием уделе источим слезы души своея/ пред незримо Сущей зде,/ умилением и любовию зовуще к Ней:/ радуйся, Обрадованная,/ верных Своих рабов не оставляющая.

Прокимен: Дивен Бог во святых Своих, Бог Израилев.

Стих: В церквах благословите Бога, Господа от источник израилевых.

Всякое дыхание: Евангелие: от Матфеа, зачало 104

По 50 псалме стихира, глас 6

Приидите, вернии людие, во святую обитель Дивеевскую,/ иже Четвертым Жребием Божия Матере нарицается,/ ублажим верную рабу Владычицы Пресвятыя Богородицы/ Александру преподобную,/
начальницу святаго места сего/ и, припадающе к честным и многоцелебным ея мощем,/ яко заповеда преподобный Серафим, усердно молимся:/ Помяни нас, госпоже и мати наша,// у Престола Божия во Царствии Небеснем.

Канон. Глас 8 Песнь 1

Ирмос: Поим Господеви,/ проведшему люди Своя сквозе Чермное море,/яко Един славно прославися.
Преподобную госпожу и матерь нашу Александру, первоначальницу обители Дивеевския и Божия Матере рабу избранную,/ и ныне за ны молящуюся, Господи, разумно воспети сподоби.
Была еси обители Дивеевския первоначальница, Александро славная,/ и Небесное Царствие унаследовала еси, исполнивши достойно Богородицы послушание.
Всю себе воздержанием и покаянием слезным очистивши, всеблаженная,/ жилище явилася еси Божие и Ангелов собеседница.
Богородичен: Пречистая Богородице,/ яже воплощенно Присносущное и Пребожественное Слово/ паче естества рождшая, поем Тя.

Песнь 3

Ирмос: Утверждей словом Небеса/ и землю основавый на водах многих,/утверди мя к пению славословия Твоего, Господи.
К Богу оком Твоея души взирающи, мати Александро,/ Того Единаго возлюбила еси и плоть свою изнурила еси, возненавидевши земная/ и ангельскую совершивши жизнь.
Лучами, мати, добродетелей страстей отгнала еси мглу яве,/ просвещение Духа во твоем сердце приемши.
Кадило благовонно Владыце и Пречистей Деве Марии твоя молитвы и труды принесла еси,/ и храмы Божии многи твоим иждивением воздвигнуты быша.
Богородичен: Утверждение буди и прибежище, и покров, Дево Богородительнице, верою к Тебе прибегающим и Божию Тя Матерь исповедающим.

Седален, глас 3 Подобен: Красоте девства:

Богатство тленное и славу мимотекущую в младых летех оставивши,/ Небесное богатство восприяла еси и славу истинно вечнующую, преподобная./ Тем блажим святое твое успение/ и, торжествующе в нем, вопием тебе:/ помяни нас у Престола Божия, мати Александро.

Слава и ныне, Богородичен:

Яже радости приемшая исполнение, приими от нас, рабов Твоих, целование Архангелово: радуйся, радость рождшая миру. Радуйся, ручко, из неяже манна небесная всем верным даровася, радуйся, Благословенная.

Песнь 4

Ирмос: Тайно пророк пред зря от Девы Тя, Слове, Воплощаема,/ песенно вопияше:/ слава силе Твоей, Господи.
Огнем любве Божия страстей терние попалила еси/ и Божия Матере собеседница была еси,/ глаголы дивиыя о Четвертом Ея Жребии во Вселенней услышавши.
Насаждена в Дому Божия Матере, добродетелей благоплодие прозябла еси,/ во основание обители камень веры положивши.
Жезлом добродетельныя твоея жизни многия души в Царствие Небесное управила еси.
Богородичен: Надежда и щит, и утверждение Ты мне еси. Благая, и лютых избавление, и просвещение души моея, и хвала, и стена, и держава.

Песнь 5

Ирмос: Утрешоюще, вопием Ти:/ Господи, спаси ны,/ Ты бо еси Бог наш,/разве Тебе, иного не вемы.
Тесный предпочла еси, нежели пространный путь, достославная, и радуяся претерпела еси/ многия труды и болезни, преподобная мати.
Житие твое всечестно бысть в Господе, Александро блаженная, и великия схимы пред кончиною сподобилася еси.
В пениих и пощениих, молитвах же и бдениих поживш::. преподобная,/ Христу уневестилася еси.
Богородичен: Доброту Тя Иаковлю возлюби Бог, Лево отроковице,/ украшая вся Тобою, омрачившаяся преступлениеV первее.

Песнь 6

Ирмос: Ризу мне подаждъ светлу,/ одеяйся светом, яко ризою. ’ Многомилостиве Христе Боже наш.
Последовала еси яве Евангелию и обнищала еси, славу родй своего презревши,/ кротка была еси и незлобива, и смиренномудрия исполнена.
Серафима преподобнаго в иеродиаконе младом предузнала еси. попечение об обители Дивеевстей на него возложивши, Александра дивная.
Душу твою, преподобная, Богу преложила еси,/ во дни и ноши благоугождая Ему/ и в час кончины Святыя Тайны Христовь: приявши.
Богородичен: Палато Царя Славы и огнезрачный была еси престол, Дево,/ Херувим превышши и Серафим:/ темже Тя всякое дыхание славит, яко Матерь Зиждителя.

Кондак, глас 3

Воспоим Днесь Пресвятую Деву,/ явившую в России первоначальницу последняго Удела Своего во Вселенней/ преподобную матерь нашу Александру,/ да ея молитвами/ Господь подаст нам грехов прощение.

Икос

Кто доволен достойно воспевати твоя, мати Александро, труды и болезни, и делания многая, и славу, и величество?/ Но молитвами твоими к Богу благоприятными Духа благодать мне ныне подаждь,/ яко да Твоя паче естества подвиги изреку верно и воспою еже паче слова терпение и смирение твое, и любовь нелицемерную, имиже врага посрамила еси./ Помяни нас у Престола Божия.

Песнь 7

Ирмос: В начале землю основавый/ и Небеса Словом утвердивый,/ благословен еси во веки, Господи Боже отец наших.
Путем шествующи, вводящим к Божественному покою, уклонилася еси пропастей демонских, блаженная,/ Божественною покрываема благодатию, вопияше: благословен еси во веки, Боже отец наших.
Велию обитель Царицы Небесныя созидающи, выну в молитве пребывала еси вопиющи:/ благословен еси во веки, Боже отец наших.
Камень под главу твою полагающи и слез потоки проливающи, спасена бе от сетей вражиих,/ в радости воспевала еси: благословен еси во веки, Господи Боже отец наших.
Богородичен: Вся еси светоносна, Свет незаходимый, Дево, приемши,/ и просвещает и, Чистая, верою Тебе вопиющих: благословен, Пречистая, Плод чрева Твоего.

Песнь 8

Ирмос: Безначального Царя славы,/ Егоже трепещут Небесныя силы,/ пойте, священницы,/людие, превозносите во вся веки.
Поревновала еси царице Александре, богомудрая, и всю жизнь в руце Божии предала еси,/ точию Единаго Христа вёдущи и Сего распята.
Дар молитвы чистыя, смирение и любовь совершенную стяжавши,/ питаеши души всех верно тя чтущих, Богоблаженная.
Добродетельми многими преукрашена,/ нищих и сирых и младенцев николиже в беде оставляла еси,/ темже вселилася еси в Небесная, ликом счисляема присно честных жен, досточудная.
Богородичен: На Тя возложих, Владычице, сердце и душу и тело: не имам бо иныя надежды, разве Тебе, Еюже получу милость. Темже подаждь ми богатую Твою благодать.

Песнь 9

Ирмос: Невидимого зраком Божественным приемшая,/ Неискусобрачная Дево и Мати,/ песньми Рождество Твое величаем.
Я ко велию в женах и всякаго поклонения достойную откры Тя Бог преподобному Серафиму,/ нам в славу и радование.
Пред кончиною икону Божия Матере Казанския на перси возложила еси, мати преподобная,/ и, Ею охраняема, к Престолу Пресвя гыя Троицы взошла еси.
Яко дерзновение к Богу стяжавши, моли о иже на земли совершающих верою память твою,/ первоначальнице обители нашея, мати Александро.
Богородичен: Едина болящих посещение, Едина падших исправление, Владычице, Едина к Богу руководительнице и входе, Едина ходатаице вечных благ, помилуй мя единаго, паче всех согрешившаго.

Светилен:

Егда убо честныя мощи твоя, преподобная Александро, обретошася, благ оухание из гроба твоего изношашеся, исцеляя недуги и отгоняя духи лукавыя.

Богородичен:

Совета великаго Ангела Отча родила еси, Христа, всепетая Отроковице, Царя Славы: Егоже крест преподобная Александра вземши, в след Сего потече. С нейже непрестанно моли о нас, Богородице.

На хвалитех стихиры, глас 5   Подобен: Радуйся, Живоносный Кресте

Радуйся, мати Александре,/ звездо пресветлая от Дивеева возсиявшая/ и Российскую страну благодатно озарившая,/ радуйся, великая подвижнице,/ древним Богоносным отцем равночестная,/ радуйся, предстательнице и помощнице скорая/ в молитвах тя призывающим./ Предвари и подвигни святыя молитвы твоя о нас ко Господу,/ и данною ти от Него благодатию/ недуги наша душевныя и телесныя исцели,// просящи даровати нам мир и велию милость. (Дважды)
Радуйся, первоначальнице обители Дивеевския,/ жилище Духа Святаго,/ сосуде Божия благодати/ и избраннице Царицы Небесныя,/радуйся, болящих целительнице, печальных утешительнице,/ заблуждших путеводительнице./ Настави и нас, мати Александро,/ в покаянии истиннем и вере православней житие скончати/ и помяни нас в молитвах твоих ко Господу,/ просящи нам у благости Его велия милости.
Радуйся, велия в женах,/ преподобных красото, Александро блаженная,/ восхваляем смирение твое и молитву к Богу чистейшую,- любовь ко всем нелицемерную,/ имиже благодать Святаго Духа стяжала еси./ Честную память твою совершающим/ подаждь дары целебныя, коемуждо по потребе,/ и моли Христа Бога// даровати нам велию милость.

Слава, глас 3

Преподобная мати Александро,/ подвиги многотруднаго жития твоего кто исповёсть,/ и милости Божия, чрез тебе явленныя, кто исчислит,/ и слез твоих источник непрестанный кто измерит./ Мы же. дерзновение твое у Пречистыя Богородицы добре ведуще. во умилении сердечнем зовем ти:/ Радуйся, госпоже наша и мати, прости, благослови, помолися за ны,/ да и мы будем прощены, яко ты прощена,/ и помяни нас у Престола Божия.

И ныне, глас 3

Без семене зачала еси от Духа Святаго,/ и славословяще воспеваем Тя:// радуйся, Пресвятая Дево.

Славословие великое

На литургии.

Блаженна 3 и 6 песни канона
Прокимен, глас 4: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Апостол к Галатам, зач. 208
Аллилуиа, глас 1: Терпя потерпех Господа, и внят ми, и услыша
молитву мою.
Евангелие Матфеа зач. 104
Причастен: В память вечную будет праведник.

Молитва

О, святая угоднице Божия преподобная мати наша Адександро! Приими недостойныя молитвы наша, с пламенною верою к тебе возносимыя, и помози нам христианския добродетели стяжати, веру крепкую и любовь к Богу и к ближним имети, крест скорбей и болезней терпети. О, госпоже наша и мати! Прости, благослови, помолися за нас, да и мы будем прощены, яко ты прощена, и помяни нас у Престола Божия, да твоими молитвами спасаеми в нынешнем веце и в будущем, удостоимся хвалити и воспевати Всесвятое Имя Отца, и Сына, и Святаго Духа во веки веков. Аминь.

2 комментария на “Служба прп. Александре Дивеевской

  1. Добрый день. У меня вопрос: Почему тропарь и кондак преподобной Александре Дивеевской не совпадает с тропарем и кондаком в церковном календаре? Может быть это другая святая?….
    Благодарю за ответ. С уважением. Александр.

    • Добрый день. Простите, что не сразу отвечаем. Укажите, пожалуйста, ссылку на страницу церковного календаря. Тропарь прп. Александре один, и его одинаково поют везде, где почитают святую.

Добавить комментарий

Ваш e-mail не будет опубликован. Обязательные поля помечены *