Служба прп. Марфы Дивеевской

НА МАЛОЙ ВЕЧЕРНИ.
На Господи, воззвах: стихиры, глас 6
Приидите, вернии людие,/ во святую обитель Дивеевскую,/иже Четвертым Жребием Божия Матере нарицается,/ ублажим верную рабу Владычицы Пресвятыя Богородицы преподобную Марфу/ и, припадающи к честным и многоцелебным мощем,/ яко заповеда преподобный Серафим,/ усердно помолимся://Помяни нас, госпоже и мати наша,// у Престола Божия во Царствии Небеснем.
Како по достоинству воспоим матерь нашу Марфу,/ дивную начальницу Дивеева Небеснаго,/ от юности благодать Святаго Духа стяжавшую/ и ныне у Престола Пресвятыя Троицы молящуюся о спасении душ наших.
Киими недостойными усты/ восхвалим ныне вселюбезную матерь нашу Марфу,/ кротостию, чистотою, послушанием совершенным/ в отрочестве Богу угодившую,/ собеседницу великаго старца Серафима,/ дивную молчальницу и хранительницу тайн Божиих об обители Дивеевской,/ подающую усердно просящим мир и велию милость.
Слава, глас 5 Подобен: «Радуйся»
Боголюбива, милостива, смиренна мудрованием/ и любве исполнена явилася еси,/ Невесто Христова Марфо,/ аки ангел на земли поживши,/ кончину блаженную в юных летех прияти сподобилася еси/ и венец улучити нетленный,/ молися о любовию чтущих тя.
И ныне праздника, глас 6
Приидите, всемирное успение/ Всенепорочныя Богородицы празднуем,/ днесь бо Ангели торжествуют/ честное преставление Божия Матере/ и к веселию нас, земных, призывают/ вопити немолчным гласом:/ радуйся, преставлыпаяся от земли/ и к Небесным обителем преселынаяся./ Радуйся, яже ученический лик облаком легким во едино собравшая./ Радуйся, упование и спасение наше,/ Тя бо христианский род непрестанно ублажает.
Прокимен дне. На стиховне стихиры, глас 2
Всех радостей Радость,/ Всеблагословенная Богородица Дева,/ радости вечныя тебе сподобила есть,/ госпоже и мати наша Марфо преподобная,/ яко служительницу Свою верную.
Радостно на подвиги потекла еси,/ ограждаема силою Божественною,/ Богородицею избранная мати преподобная, Марфо славная,/ молися о чтущих тя верно.
Великий Ангельский образ восприявши,/ начальницею Небеснаго Дивеева/ ты явилася еси, преподобная Марфо,/ помолися за чтущия тя.
Слава, глас 1
Отроковице благодатная Богородице Марие,/ радости вся исполнила еси,/ даровавши верным обитель Свою святую,/ иже Четвертым жребием именуется,/ небесною начальницею обители избравши отроковицу всеславную Марфу./ Велия сила чудес Твоих,/ Богомати, спаси Тя величающия.
И ныне праздника, глас 2
Двери Небесныя,/ возмитеся,/ зряще дверь Вышняго,/ идущу со славою/ к Сыну и Богу.

НА ВЕЛИЦЕЙ ВЕЧЕРНИ:
На Господи, воззвах: стихиры праздника, глас 1
О, дивное чудо!/ Источник Жизни/ во гробе полагается,/ и лествица к Небеси гроб бывает./ Веселися, Гефсимание,/ Богородичен святый доме./ Возопием, вернии,/ Гавриила имуще чиноначальника:/ Благодатная, радуйся,/ с Тобою Господь,/ подаяй мирови Тобою велию милость.
Дивны Твоя тайны, Богородице:/ Вышняго престол/ явилася еси, Владычице,/ и от земли к Небеси преставилася еси днесь./ Слава Твоя боголепная,/ богоподобными сияющи чудесы./ Девы с Материю Царёвою,/ на высоту вознесошася./ Благодатная, радуйся,/ с Тобою Господь,/ подаяй мирови Тобою велию милость.
Твое славят успение/ Власти и Престоли,/ Начала и Господства,/ Силы и Херувими и страшнии Серафими,/ радуются земнороднии,/ о Божественней Твоей славе красящее я,/ припадают людие со Архангелы и Ангелы и воспевают:/ Благодатная, радуйся,/ с Тобою Господь,/ подаяй мирови Тобою велию милость.
Ины стихиры святыя, глас 4
Светися, обитель Божия Матере, и веселися,/ ныне воистину священный и радостный наста праздник,/ непорочную невесту Христову венчаем песенными цветы./ Небеса убо достойно да веселятся, земля же да радуется,/ инокини же твоими, Марфо, молитвами хранимы, ликуют,/ спасаеши от напастей нечаемых и бед/ и благодать исцелений подаеши/ совершающим светозарную память твою.
Дивны Твоя тайны, Богородице:/ явила бо еси в Дивееве последний удел Твой во вселенней,/ дарования всех жребиев Твоих имущий/ и благодать обильную Всесвятаго Духа Божия,/ ныне обогатившийся мощами преподобных жен во обители сей просиявших/ Александры и Елены с ними же и Марфы,/ одесную Тебе предстоящей,/ приведеся бо вслед Тебе искренняя Твоя послушница,/ в веселии и радовании в храм небесный введеся/ и Всемилостивому Спасу о спасении нашем тепле молится,// даровати душам нашим мир и велию милость.
О, преподобная мати наша Марфо,/ измлада Господа возлюбившая/ и Ему усердно во обители сей послужившая/ юная собеседнице и любимая послушнице преподобнаго Серафима,/ начальницею Небеснаго Дивеева им нареченная,/ непрестанную молитву Иисусову стяжавшая и великия схимы от Господа удостоившаяся,/ныне в мощах почиваеши и исцеления всем с верою и любовию к тебе притекающим источаеши,// темже усердно молим тя: помяни нас у Престола Божия.
Глас 8
Преподобная мати наша Марфо,/ Жениха Христа издётска возжелевшая,/ свещу твою светло уготовала еси,/ добродетельми духовно просиявши, славная,/ преставилася еси божественно радующися,/ на Небеси ныне Престолу Божию предстоиши,/ на земли духом любве с нами пребываеши,/ имеющи велие дерзновение ко Господу и Пречистей Его Матери,// темже молися от бед избавити любовию величающих тя.
Преподобная мати наша Марфо,/ небесною чистотою просияла еси,/ Чистыя Девы служительница верная явилася еси,/ приими малое моление наше,/ милостива буди тя призывающим,/ страстей мрачную бурю отжени,/ скорбь и стенания сердечная преложи на радость,/ ко пристанищу тишины божественныя настави,/ от отчаяния сохрани, недужныя скоро исцели/ и моли непрестанно Небесе и земли Царицу/ сохранити обитель сию от наветов вражиих необориму// и спастися душам нашим.
Слава, глас 8
Преподобная мати Марфо всехвальная,/ любовь имела еси, совершение добродетелей,/ тайны будущия, предреченныя преподобным Серафимом/ об обители Дивеевской и великой славе ея хранила еси,/ наставлениям старца верно последовала еси,/ чиста, кротка и непорочна была еси,/ Царствие Божие внутрь себе стяжавши,/ всем житием своим Создателю послуживши,/ Егоже возлюбила еси, Егоже ради подвизалася еси,/Емуже о нас молися во Царствии Небеснем.
И ныне, праздника, глас 6
Приидите, всемирное успение/ Всенепорочныя Богородицы празднуем,/ днесь бо Ангели торжествуют/ честное преставление Божия Матере/ и к веселию нас, земных, призывают/ вопити немолчным гласом:/ радуйся, преставльшаяся от земли и к Небесным обителем преселыдаяся./ Радуйся, яже ученический лик облаком легким во едино собравшая./ Радуйся, упование и спасение наше,/ Тя бо христианский род непрестанно ублажает.
Вход. Прокимен дне. Премудрости Соломоновы чтение (Глава 3)
Праведных души в руце Божией, и не прикоснется их мука. Непщевани быша в очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмапе наказане бывше, великими благодетельствовани будут, яко Бог искуси я, и обрете их достойны себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: яко благодать и милость в преподобных Его и посещение во избранных Его.
Премудрости Соломоновы чтение (Главы 5 и 6)
Праведницы во веки живут, и в Господе мзда их: и попечение их у Вышняго. Сего ради приимут царствие благолепия и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы мблниины, и яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихорь развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех языков, яко дана есть от Господа держава вам и сила от Вышняго.
Премудрости Соломоновы чтение (Главы 4 и 5)
Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долго: угодно бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.
На литии стихира, глас 6
Днесь созывается к веселию вся Нижегородская земля/ и обитель Дивеевская торжествует:/ наста бо память преставления Марфы
преподобныя,/ во цвете юности избравшей тесную стезю./ Любовию Христовою побеждаема,/ Небесным Серафимам отроковица уподобилася есть,/ ныне приносим ей похвальная,/ не песньми токмо славяще, но и житию подражати желающе/ и славу Богу воздающе/ за таковую теплую молитвенницу о душах наших.
На стиховне стихиры, глас 2 Подобен: Егда от древа
Любовию Божественною измлада возгоревшися,/ преподобная мати наша Марфо,/ кротость, чистоту стяжавши и смирение,/ послушание Царицы Небесныя и старца Серафима исполнила еси/ и начальницею Небеснаго Дивеева ими нареченная,//ныне ликуеши во Царствии Небеснем.
Стих: Дивен Бог во святых своих, Бог Израилев.
Дивная отроковице,/ преславное житие твое — монашествующих украшение,/ от юных лет бо Христу от всея души последовала еси/ и аки ангел на земли пожила еси,/ в подвизех неутомимая даже до смерти, мати наша Марфо.
Стих: Честна пред Господем смерть преподобных Его.
Веселися обитель Дивеевская,/ имущи в себе сокровище многоценное/ честныя мощи Марфы досточудныя,/ источают бо обильныя дары целебныя/ с верою и любовию притекающим к ним.
Слава, глас 7
Егда свет Божественныя любве возсия в сердце твоем/ и во обитель Дивеевскую вселилася еси,/ дух горящий непрестанно ко Господу возносила еси,/ от духовнаго отца своего преподобнаго Серафима наставляема,/ тогда исполнилася еси изобильно благодати
Духа Святаго,/ ныне ко спасению буди наставница величающим тя,// Марфо приснопамятная.
И ныне праздника, глас 8
Девичестии лицы/ днесь тайно одру Девы и Матере окрест предстоят,/ и, души праведных обступивше, Царицу славят./ Ови убо яко дар девство вместо мира приносят,/ ови же невещественное пение с добродетелию приносят:/ подобает бо Матери Божии яко Царице/ царскими добродетельми светлосияющими дориноситися./ С нимиже и мы, житие чистое совнесше,/ изыдем к погребению сущия Матере Бога нашего,/ пеньми и песньми духовными/ согласно Ю ублажающе.
НА УТРЕНИ
Тропарь святыя, глас 2
Равноангельное житие стяжавшая, «дивная отроковице»/ и собеседнице преподобнаго Серафима,/ госпоже и мати наша Марфо,/ ныне в мощех почиваеши/ и у Престола Божия предстоиши,/ моли о нас Милостиваго Бога, Небеснаго Дивеева начальнице.
По 1-м стихословии, седален, глас 7
Возсиявши яко звезда утренняя,/ яко светлое солнце память честная преподобныя Марфы,/ просвещает жительствующия на месте сем/ и согревает монашествующих сердца к подражанию жития ея постническаго/ к ревности о вере Христовой.
Слава и ныне праздника, седален, глас 4
Велением Зиждителя Твоего, рождшагося из Тебе,/ облак собра апостолы Твое видети преставление./ Темже и со славою и многим веселием погребоша,/ воспевающе пречистое тело Твоего блаженства, Мати Христа Бога.
По 2-м стихословии седален, глас 1
Осияема ныне непрестанною славою Пресвятыя Троицы, мати наша Марфо,/ и Божественнаго веселия и радости исполнена,/ тепле о нас молися у Престола Пресвятыя Троицы избавитися нам муки вечныя.
Слава и ныне праздника, седален, глас 4
Апостольский лик, разсеянный по земли, собрася в Сионе,/ да предпослет от земли Богородицу к Вышнему, Егоже роди./ Силы Небесныя премирныя предтечаху, вкупе и ликоваху, духовне зовуще:/ веселитеся, Небеса, приемше Божию Матерь,/ Иже владычествует видимыми и невидимыми.
Величание:
Ублажаем тя, преподобная мати наша Марфо, и чтим святую память твою, ты бо молиши о нас Христа Бога нашего.
По полиелеи седален, глас 1
Невеста прекрасная Чертога Царскаго/ преподобная Марфо/ в послушании, воздержании и молитве/ в обители нашей просиявшая и Начальницей Небеснаго Дивеева Богородицею избранная, молися прилежно о спасении душ наших.
Слава и ныне праздника, седален, глас 4
Возопий, Давиде, что сей праздник,/ егоже воспел еси древле в книзе псаломстей?/ Яко Дщерь, Богоотроковицу и Деву, преложи Ю на оны обители Христос,/ Иже из Нея без Семене рождся./ И сего ради радуются матери, и дщери, и невесты Христовы, вопиюще:/ радуйся, преставившаяся к Вышнему Царствию.
Прокимен: Дивен Бог во святых Своих, Бог Израилев.
Стих: В церквах благословите Бога, Господа от источник израилевых.
Всякое дыхание:
Евангелие: от Матфеа, зачало 104
По 50 псалме стихира, глас 6
Марфо богоносная,/ послушание и безмолвие от юности возлюбившая,/ чадо возлюбленное преподобнаго Серафима,/ просиявшая в молитве и посте,/ крест скорбей, болезней и трудов даже до смерти понесшая/ Христа ради Небеснаго Жениха,/ венцы многими от Него украшенная,/ молися о чтущих тя.
КАНОН
глас 8 Песнь 1
Ирмос: Колесницегонителя:
Боже всех, дар словесе подаждь ми, Твоему рабу,/ ныне начинающему хвалити песньми в Четвертом уделе Божия Матере просиявшую отроковицу дивную, преподобную матерь нашу Марфу.
Преподобную Марфу песньми почтим,/ благословение Пресвятыя Девы исполнившую,/ велия бо есть угодница Божия,/ наша теплая предстательница и молитвенница непрестанная о спасении душ наших.
Праведно есть восхвалити преподобную Марфу,/ отроковицу непорочную, в подвизех с древними отцами равночестную/ и Небеснаго Дивеева начальницу.
Богородичен: Радуйся, Пресвятая Госпоже, освятившая Дивеево Твоим пришествием,/ радуйся, насадившая веру истинную, радуйся, собравшая монашествующих множество.
Песнь 3
Ирмос: Небеснаго круга:
Великое смотрение Божие от утробы материи тя освяти/ и сосуд показа благоприятен Святаго Духа,/ темже от младенства присно была Божиею Материю ограждаема.
Вкоренившееся в души твоей желание неизреченное красоты Христовы стяжавши,/ радостно с сестрою Параскевою к старцу Серафиму в дальнюю пустынку потекла еси.
Мужество души твоея провидя, преподобный Серафим/ в Дивеевскую общину отроковицу тя, тринадесяти лет сущую,/ жительствовати направи.
Богородичен: Радуйся, во Удел Себе Дивеево избравшая,/ радуйся, Заступницею места сего быти изволившая;/ радуйся, верным, пребывающим зде, Подательнице земных благ;/ радуйся, Споручнице вечнаго их спасения.
Кондак и икос праздника Слава, седален, глас 2
Вся временная мира сего презревши,/ Небеснаго возжелела еси./ Молчанием, кротостию и смирением от юности твоея образ равноангельнаго жития явила еси,/ Небеснаго Дивеева начальнице,/ преподобная мати наша Марфо.
И ныне праздника
Всечестный лик премудрых апостол собрася чудно/ погребсти славно тело Твое пречистое, Богородице Всепетая./ С нимиже воспеша и Ангел множество, преставление Твое честно хваляще,/ еже верою празднуем.
Песнь 4
Ирмос: Ты моя крепость, Господи:
Царствие Божие внутрь тебе сущее измлада познала еси и житие твое краткое подвигами суровыми украсила еси, любовию к Жениху Небесному горящи.
Стопами Богоотроковицы Марии шествовала еси, служение Марфы и Марии соединяющи, яко Марфа в послушании пребывши и яко Мария выну при ногу Иисусову приседящи.
Пищею молитву непрестанную имаше, в кротости небесней и молчании во обители пожила еси,/ Марфо всехвальная, чадо возлюбленное преподобнаго Серафима.
Бога возлюбивши от всея души, преподобная,/ в целомудрии и подвизех сестер всех превзошла еси/ и в молитве непрестанной дух ко Господу возносила еси.
Богородичен: Радуйся, теплая Ходатаице о живущих в Четвертом Жребии Твоем;/ радуйся, милость Сына Твоего до скончания века месту сему обещавшая;/ радуйся, радосте и спасение душ наших.
Песнь 5
Ирмос: Вскую мя отринул еси:
Спасительным именем Иисусовым поучалася еси присно,/ ведуще Единаго Христа и Сего распята,/ ум свой просвещающи Божественным Светом,/ сердце же услаждающи умилением и радостию,/ юже молитвами твоими и нам подавай, поминающим тя.
Песнь сугубую приношу твоему терпению и кротости, мати Марфо,/ како смирялася еси, болезни и скорби иноческаго жития мужески претерпевающи.
Собеседнице и любимая послушнице преподобнаго Серафима, Марфо юная,/ изрядно во обители потрудилася еси и в молчании выну пребывала еси,/ тайны будущия славы обители Дивеевския сохраняющи.
Богородичен: Радуйся, Дево, яко благословением Твоим осени Дивеево сила Вышняго;/ радуйся, яко обитель Твоя наполнишася подвизающимися;/ радуйся, яко просия зде множество преподобных, молящихся о спасении душ наших.
Песнь 6
Ирмос: Очисти мя, Спасе:
Труды постническими и медом безстрастия наслаждалася еси,/ скрывающи себе мирскаго жития в общине преподобныя Александры и ея подвигом ревнующи.
Безплотную во плоти видеша тя сестры твоя,/ во отрочестве паче стариц духовно просиявшую.
Многоразличныя подвиги во обители Дивеевской совершивши,/ сими от земли воспарила еси во Обители Небесныя,/ яко златая голубица,/ идеже помяни и нас, восхваляющих тя.
Богородичен: Радуйся, яко на наследие Твое присно призираеши;/ радуйся, яко благодати и милости Своея сподобляеши нас;/ радуйся, благословение Сына Твоего на нас низводящая.
Кондак, глас 8
Небесною кротостию, молчанием и неземною радостию исполнилася еси,/ юная и невиданная доселе в Дивееве отроковице,/ преподобная мати наша Марфо,/ в великую схиму от преподобнаго Серафима облеченная,/ темже водворилася еси с мудрыми девами в Небесном чертозе/ и со Ангелы Всецарю непрестанно предстоиши.
Икос
Вся силы небесныя радостно прияша душу твою, преподобная мати Марфо,/ и вознесоша ю во Обители Небесныя, идеже ныне почиваеши близ Пресвятыя Троицы,/ начальницею Небеснаго Дивеева нареченная и велие дерзновение у Господа улучившая,/ не забывай о нас, земных чадех твоих, и поминай нас у Престола Божия.
Песнь 7
Ирмос: Отроцы еврейстии в пещи:
Дивно долготерпение твое, о мати Марфо, ибо велия скорби и болезни яко дар Божий восприяла еси. Укрепи нас молитвами твоими, в нетерпении и малодушии изнемогающих, болезни пути узкаго претерпети, имже в вечный живот внидем.
Жениха приити хотяща в полунощи, яко слышавши,/ не дала еси сна очима твоима,/ но, молитву Иисусову непрестанно творящи,/ мудрым девам сопричиталася еси.
Духовне зряще твое в высшия чины Херувимов и Серафимов устремление, преподобный отец наш Серафим в великий ангельский образ тебе, отроковицу Марию, облече и схимонахинею Марфою тя нарече.
Богородичен: Радуйся, всяких даров рабом Твоим Всещедрая Подательнице;/ радуйся, во брани, в болезнех и трудех их премилосердая Утешительнице;/ радуйся, надеждо и спасение душ наших.
Песнь 8
Ирмос: Седмерицею пещь:
От ревности святей силы телесныя даже до смерти истощила еси, камень за каменем в построение храма Божия полагающи, и тако в трудех и молитве непрестанной душу святую в руце Божии предала еси.
Плакаше преподобный Серафим, кончину блаженныя Марфы духом предуведевший,/ и душу ея в Царствии Небеснем близ Святыя Троицы узрел есть.
Царица Небесе и земли по отшествии твоем, прияла есть тя, мати Марфо, безмолвием и молитвою Ей много угодившую, в лик святых дев, Ею возлюбленных и Ей у Престола Божия сопредстоящих.
Богородичен: Радуйся, Хранительнице наша в настоящем веце;/ радуйся, Предстательнице и непостыдное упование в будущем;/ радуйся, прилог всякаго зла от жребия Своего последняго отражающая.
Песнь 9
Ирмос: Ужасеся о сем Небо:
Преподобная мати наша Марфо, Царицы Небесныя послушнице истинная, начала тьмы пособием Ея победивши,/ плоть умертвивши и дух ожививши,/ благодати приявшая Божественное действо,/ не престай молящися за ны ко Господу.
Победила еси тьмочисленная коварства врага, стезею тесною шествовавши,/ и Подвигоположнику Господу угодила еси,/ от Негоже венец приемши,/ чудес источник стяжала еси, светлое воздаяние.
Божественная рака мощей твоих благоухает паче иных аромат, чувства всех и сердца услаждающи, преподобная,/ притекающих в храм Рождества Пречистыя Богородицы.
Юже ти раболепно принесох, окаянный, песнь приими, преблаженная мати,/ и воздаждь свыше благодать, недугов избавляющи и искушений,/ внегда судити ми ся, представши, избави мучения, собеседнице Ангелов.
Богородичен: Песни благодарственныя вси мы в обители сей святой живущии приносим Ти, Мати Божия,/ яко спасаеши нас присно от всякаго обстояния,/ питаеши, устрояеши и о нас промышляеши./ Но молим Ти ся,/ и Божествеинаго Царствия по кончине нашей сподоби нас.
Светилен, Подобен: Чертог Твой
Радуйся, Дивеевская обитель славная,/ молитвенницу имущи просиявшую в тебе/ преподобную мати Марфу/ вкупе с преподобными Александрою и Еленою,/ днесь о нас молящихся прилежно избавитися нам муки вечныя.
На хвалитех Стихиры праздника на 5, глас 4 Подобен: Яко добля:
В славном успении Твоем/ Небеса радуются,/ и ангельская возрадовашася воинства,/ вся же земля веселится, песнь Тебе исходную провозглашающи,/ Матери всеми Владычествующаго,/ Неискусобрачная Пресвятая Дево,// Яже род человеческий избавлыная прародительнаго осуждения.
От конец стекошася апостолов лучшии,/ богоначальным мановением, погребсти Тя,/ и от земли вземлему Тя к высоте зряще,/ глас Гавриилов радостию вопияху Тебе:/ радуйся, Носило Божества всего./ Радуйся, Едина, земная с Вышними/ Рождеством Твоим совокуплыпая.
Яже живот рождшая,/ к жизни преминула еси,/ честным успением Твоим, безсмертней,/ дориносящим Тя Ангелом, Началом и Силам,/ апостолом и пророком и всей твари,/ приемшу же нетленными дланьми Сыну Твоему/ непорочную душу Твою,/ Дево Мати Богоневесто.
Стихиры преподобныя Марфы, глас 5, Подобен: Радуйся
Радуйся, Небеснаго Дивеева начальнице,/ преподобная мати наша Марфо,/ яко небо светлыми звездами украшаемо,/ житие твое многими подвиги преисполнено;/ младенствующи леты, духовною крепостию утвердилася еси/ и от Господа великия схимы удостоилася еси;/ помози и нам неленостно во спасение трудитися/ и единому Богу послужити,/ Егоже моли даровати душам нашим мир и велию милость.
Радуйся, дивная и несравненная отроковице,/ яко крин любовию Божественною процветшая,/ выну возносила еси свой горящий дух ко Господу,/ юным сердцем возлюбивши Жениха Небеснаго;/ радуйся, преподобнаго Серафима сотаиннице,/ любительнице безмолвия и целомудрия,/ ликом мудрых дев сочетавшаяся/ и Христу уневестившаяся светло,/ испроси притекающим к раце твоей цельбоносней/ печалей утоление, болезней исцеление,/ благодать в подвизех любве и смиреннаго ближним служения,/ и душам нашим мир и велию милость.
Радуйся, преподобная мати наша Марфо,/ начальнице Дивеева Небеснаго,/ в бдениих и молитвах неутомимая,/ лоза плодовита во младых летех явилася еси,/ показавши, яко воистину возраст старости — житие нескверное,/ кончиною благою скончавшая житие твое/ и ныне со ангелы предстоящая огнезрачному Престолу Вседержителя,/ поминай чтущих успение твое честное/ и молися ко Господу даровати душам нашим мир и велию милость.
Слава, глас 8 «О преславнаго чудесе!»
О преславнаго чудесе!/ О новаго начинания,/ исполнение наста обетования всеславнаго:/ днесь Небесная Игумения обители прославляется,/ ангелы, Богоневесто, удивляет Твоих тайн глубина,/
Дивеево, Тобою возлюбленное, николиже оставляеши/, и по кончине избранницы Твоея преподобныя Марфы/ явилася еси с нею во храме во свете несказанном,/ приемлеши бо ея молитвы за Обитель яко Милостивая.
И ныне праздника, глас 6
На безсмертное Твое успение,/ Богородице, Мати Живота,/ облацы апостолы по воздуху восхищаху,/ и, по миру разсеянныя,/ во едином лице предсташа пресвятому Твоему телу,/ еже и погребше честно,/ глас Тебе Гавриилов поюще, вопияху:/ радуйся, Благодатная Дево,/ Мати Безневестная, Господь с Тобою./ С нимиже, яко Сына Твоего и Бога нашего моли/ спастися душам нашим.
На литургии
Блаженны праздника песнь 7 на 4 и преп. Марфе песнь 3 на 4
Прокимен, глас 4: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Апостол к Галатам, зач. 208
Аллилуиа, глас 1: Терпя потерпех Господа, и внят ми и услыша молитву мою.
Евангелие Матфеа зач. 104 Причастен: В память вечную будет праведник.
Молитва
О, богомудрая и дивная отроковице, сосуде благодати Божия, в простоте голубиной пожившая, кротостию небесною, чистотою и послушанием просиявшая, сотаиннице преподобнаго Серафима, Небеснаго Дивеева начальнице, госпоже и мати наша Марфо, буди любящим и чтущим тя ходатаица спасения, в страсе Божием нас утверди, да горняя мудрствуем, а не земная, изнемогающия силы наша на бодрость премени, в любве и единомыслии укрепи и помяни нас, грешных, у Престола Божия во Царствии Небеснем.

Добавить комментарий

Ваш e-mail не будет опубликован. Обязательные поля помечены *