Служба преподобной Елене Дивеевской

НА ВЕЛИЦЕЙ ВЕЧЕРНИ:

На Господи воззвах, глас 1. Подобен: «Небесных чинов»
Небесных чинов радование/ на Небесех Благословенная и на земли славословимая/ Владычица Пресвятая Дева/ яви последний свой удел во вселенней/ и сподоби тя, преподобная мати наша Елено,/ избранницей Ея быти и начальницей обители пречудной./ Молися о любовию чтущих тя.
Заступницу стяжавши Богородицу Марию/ и Тоя державное предстательство имущи,/ вражьяго навета не убоялася еси, преподобная,/ воззвавши из глубины души к Ней тепле:/ Царице Небесная, спаси и приими обет мой,/ исхити от хотящаго мя поглотити./ И тако силою Пренепорочныя Богоневесты/ змия лукаваго крепко посрамила еси, всеблаженная.
Елены память ныне светло празднуем,/ вольным бо стремлением избравши тесную стезю,/ чудным изменившися изменением,/ к ревности жития непорочнаго себе воздвигла еси,/ покаяния светом озаривши сердце свое,/ Жениха Краснаго всею душею возлюбила еси,/ волею нас ради пострадавшаго и искупившаго вся,/ с Нимже и радости воскресения наслаждаешися светло/ и подаеши притекающим к тебе утешение.
Глас 6 «Свете тихий…»
От юности любовию Христовою утвердившися,/ пришедши ко старцу Серафиму,/ смиренно просила еси его и неотступно/ на путь монашеский благословения,/ и не всуе слезы твои проливашеся тепле:/ старец, провидя весь путь твой боголюбивый,/ испытав тя три лета и честно предуготовив,/ посла тя на жительство в общину Дивеевскую,/ идеже подвизалася еси усердно,/ преподобная мати наша Елено.
Мироносицы жены утру глубоку ароматы вземши,/ ко гробу Господню со тщанием приидоша;/ преподобная мати наша Елено,/ тихаго пристанища обители достигши,/ молитвы благоухания чистейшей яко миро Спасу принесши,/ добротою добродетелей славно украсивши свою душу/ божественной благодати световидными лучами просвещаема/ светом богоразумия озари и наша сердца,/ верою славящих тя.
Исполняющи поручения старца Серафима,/ Мельничныя общины дивная начальнице,/ преподобная мати наша Елено,/ с благим намерением о здании церквей/ последовала еси в различныя веси,/ и, имеющи попечение о благолепии церковнем,/ в храме Божием день и нощь пребывала еси неотходно,/ яко в чертозе небесном и украшенном, радуяся,/ от чистаго сердца псалмы и пения Богу возсылающи,/ моли о любовию величающих тя.
Глас 5 «Радуйся…»
Радуйся, невесто Христова Елено всеславная,/ Невесту Неневестную возвеличившая Богородицу/ и славословившая Троицу Единосущную и Нераздельную,/ украшающи смирением к высоте яве вознеслася еси добродетелей,/ к подвигам неослабным потекла еси, зовущи:/ сердце мое да возвысится к Тебе, Слове./ Радуйся, благочестно и непорочно в обители пожившая,/ тем и незлобие и любы твоя образ постави Человеколюбца Христа,/ Емуже и, приявши ангельский чин, обручилася еси,/ моли даровати душам нашим мир и велию милость.
Радуйся, преподобная мати наша Елено,/ яко горлица любящи гнездо/ в обители от Чистыя Голубицы созданной,/ возжелевшая жити неисходно,/ труды над деланием чудныя Канавки Божия Матере полагающи, идеже прошла еси Преблагословенная Дево, в четвертый удел взявши Дивеево,/ радуйся, девическия обители начальницею бывшая,/ милосердием искренне ближним послужившая и Богу благоугодившая,/ ангельския чистоты ревнительнице,/ оружие воздержания и щит молитвы держащи присно,/ добраго подвига иночества образ и правило явилася еси,/ твоим заступлением и наши души плодоносны Господеви соделай/ и моли даровати нам мир и велию милость.
Слава, глас 1
Светися, обитель Божия Матере, и веселися,/ обогатившаяся многоцелебными мощами преподобныя Елены досточудныя,/ ибо ныне воистинну священный и радостный наста праздник,/ непорочную невесту Христову венчаем песненными цветы,/ небеса убо достойно да веселятся, земля же да радуется,/ инокини же твоими, Елено, молитвами хранимы ликуют,/ спасаеши от напастей нечаемых и благодать исцелений подаеши,/ совершающим светлую память твою.
И ныне, праздника:
Вход. Прокимен дне.
Премудрости Соломоновы чтение (Глава 3)
Праведных души в руце Божией, и не прикоснется их мука. Непщевани быша в очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказане бывше, великими благодетельствовани будут, яко Бог искуси я, и обрете их достойны себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: яко благодать и милость в преподобных Его и посещение во избранных Его.
Премудрости Соломоновы чтение (Главы 5 и 6)
Праведницы во веки живут, и в Господе мзда их: и попечение их у Вышняго. Сего ради приимут царствие благолепия и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострйт же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихорь развеет их, и опустошит всю землю беззаконие, и злодейство превратит престолы сильных. Слышите убо царие, и разумейте, навыкните судии концев земли. Внушите держащии множества, и гордящиися о народех языков, яко дана есть от Господа держава вам, и сила от Вышняго.
Премудрости Соломоновы чтение (Главы 4 и 5)
Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долго: угодно бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.
На литии, глас 7
Преподобная мати наша Елено,/ Жениха Христа возлюбивши,/ свещу твою ревностно уготовала еси,/ добродетельми просиявши, славная,/ желание твое ныне исполнися:/ на Небеси Престолу Божию предстоящи,/ на земли духом любве с нами пребываеши,/ имущи дерзновение ко Господу и Пречистей Его Матери,/ предстательствуй от бед избавити/ величающих тя: радуйся, заступнице и молитвеннице наша.
На стиховне стихиры, глас 4
Преподобная мати наша Елено,/ чистым житием последовавши Владыце Христу,/ вся вражия силы низложивши крепко,/ молящи ти ся, враг невидимый хотяще устрашити тя./ Ты же оружием Креста оградившися и прибегши к предстательству Богоматере,/ просящи помощи у старца Серафима,/ светло победила еси тьмы миродержца;/ коварства вражия и страхования оскудеша вся/ постом, молитвою усердною твоею и слезами,/ тем и венценосица явилася еси./ Наваждений и козней вселукаваго и нас избави,/ и моли спастися душам нашим.
Стих: Дивен Бог во святых своих,/ Бог Израилев.
Преподобная мати наша Елено,/ чисто житие твое совершила еси,/ Чистыя Девы служительница явилася еси,/ предстоящи Ей, приими моления наша:/ милостива буди тя призывающим,/ страстей мрачную бурю отжени,/ скорбь и стенание сердечныя преложи на радость,/ ко пристанищу тишины божественныя настави,/ от отчаяния спаси, недужныя скоро исцеляющи,/ молящи непрестанно Матерь щедрот и Воеводу Непобедимую/ сохранити обитель сию непреобориму/ и спастися душам нашим.
Стих: Честна пред Господем/ смерть преподобных Его.
Преподобная мати наша Елено,/ чистая мироположнице Святаго Духа,/ благости, тихости и любве исполнена,/ кроткая и кроткаго Христа подобнице,/ простотою и смирением светло украшена,/ милостива душею, подаяния бедным раздавала еси тайно,/ темже и наследие нетленно в земли кротких восприяла еси,/ испроси и нам благодать Живоноснаго Духа,/ радости приятие, неистощимое богатство исцелений/ и спасение душам нашим.
Слава, глас 2 «Егда…»
Егда от старца Серафима благословение восприяла еси/ и того учение положивши в сердце своем,/ преподобная мати наша Елено,/ откровений о будущем обители Дивеевстей сподобилася еси,/ тогда наставлениям его верно последовавши,/ свято хранила еси вся заповеданная,/ духовной радости исполнившися и житие стяжавши ангельское,/ темже о нас молися, да зовем ти:/ радуйся, обители нашея хранительнице.
И ныне, праздника.
НА УТРЕНИ:
Тропарь святыя, глас 1
Добродетельми кротости, смирения и воздержания просиявшая,/ таинственная начальнице Мельничныя общины, в Дивееве явилася еси,/ преподобная мати наша Елено,/ даже до смерти в совершением послушании/ старцу Серафиму пребыла еси/ и Господа лицезрети сподобилася еси,/ испроси и нам дерзновение Ему Единому служите/ во спасение душ наших.
По 1-ом стихословии, седален, глас 7
Возсиявши яко звезда утренняя,/ яко светлое солнце память честная преподобныя Елены,/ просвещает жительствующия на месте сем/ и согревает монашествующих сердца к подражанию жития ея постническаго/ к ревности о вере Христовой.
Слава и ныне, праздника:
По 2-ом стихословии седален, глас 1
Осияема ныне непрестанною славою Пресвятыя Троицы, мати наша Елено,/ и Божественнаго веселия и радости исполнена,/ тепле о нас молися у Престола Пресвятыя Троицы избавитися нам муки вечныя.
Слава и ныне, праздника:
Величание:
Ублажаем тя, преподобная мати наша Елено, и чтим святую память твою, ты бо молиши о нас Христа Бога нашего.
Псалом избранный: Терпя потерпех Господа:
По полиелеи седален, глас 2 «Егда…»
Егда от старца Серафима благословение восприяла еси/ и того учение положивши в сердце своем,/ преподобная мати наша Елено,/ откровений о будущем обители Дивеевстей сподобилася еси,/ тогда наставлениям его верно последовавши,/ свято хранила еси вся заповеданная,/ духовной радости исполнившися и житие стяжавши ангельское,/ темже о нас молися, да зовем ти:/ радуйся, обители нашея хранительнице.
Слава и ныне, Богородичен:
Радуйся, Ангелом радость мира приемшая. Радуйся, рождшая Творца Твоего и Господа. Радуйся, сподобльшаяся быти Мати Божия.
Степенна, 1-й антифон 4 гласа:
Прокимен: Дивен Бог во святых Своих, Бог Израилев.
Стих: В церквах благословите Бога, Господа от источник израилевых.
Всякое дыхание:
Евангелие: от Матфеа, зачало 104
По 50 псалме стихира, глас 1
Светися, обитель Божия Матере, и веселися,/ обогатившаяся многоцелебными мощами преподобныя Елены досточудныя,/ ибо ныне воистинну священный и радостный наста праздник,/ непорочную невесту Христову венчаем песненными цветы,/ небеса убо достойно да веселятся, земля же да радуется,/ инокини же твоими, Елено, молитвами хранимы ликуют,/ спасаеши от напастей нечаемых и благодать исцелений подаеши,/ совершающим светлую память твою.
КАНОН, глас 8  Песнь 1
Ирмос: Колеснице гонителя фараоня погрузи,/ чудотворяй иногда/ моисейский жезл, крестообразно поразив,/ и разделив море:/ Израиля же беглеца, пешеходца спасе,/ песнь Богови воспевающа.
Страстными мя бурями всюду погружаема, и помышлений молвою душу мою колеблему, ко пристанищу тихому Христовы воли, молитвами твоими, преподобная Елено, направи, яко да достойно тя воспою.
Девственными добротами просвещена, богоблаженная Елено, Чистому Слову уневестилася еси, поживши пощением божественне: и Того живоносным стопам последовала еси, умерщвление страстей претерпевши.
Божественных отец наказанию последовала еси славная Елено, и сих нраву чисте поревновала еси, воздержанием яко безплотна, и чистотою и девством поживши преподобная, и истинным смирением.
Богородичен: Радуйся, Пресвятая Госпоже, освятившая Дивеево Твоим пришествием, радуйся, насадившая веру истинную, радуйся, собравшая монашествующих множество.
Песнь 3
Ирмос: Небеснаго круга/ верхотворче Господи,/ и церкве Зиждителю,/ Ты мене утверди в любви Твоей/ желаний краю, верных утверждение,/ Едине Человеколюбче.
В небесныя чертоги светозарныя вселилася еси, невеста избранна бывши Вседержителю, исцеления реки источаеши, преподобная Елено, страстная нам течения изсушающи.
Украсилася еси желанием крайним желающи Христа, премножеством благосердия, плотию обнищавшаго, и последовала еси животным Его словесем, житейская вся красная возненавидевши.
Позлащенне криле добродетели стяжавши, на высоту небесную возлетела еси, блаженная Елено, яко голубица нетленная.
Богородичен: Радуйся, во Удел Себе Дивеево избравшая,/ радуйся, Заступницею места сего быти изволившая;/ радуйся, верным, пребывающим зде, Подательнице земных благ;/ радуйся, Споручнице вечнаго их спасения.
Кондак и икос праздника
Седален, глас 4 Подобен: Вознесыйся на крест:
Красотами явилася еси девственно преукрашаема, постнических священных подвигов, яко невеста непорочная дева Христова: и с Ним в нетленный вошла еси чертог и красот Его наслаждаешися. Но моли спастися нам от всякия беды, любовию поющим тя.
Слава, и ныне, Богородичен:
Чистая Всенепорочная, и Неискусобрачная, Едина безлетнаго Сына и Слово Божие в лете рождшая: Того со святыми и честными апостолы, мученики и пророки, и преподобными моли, даровати нам очищение, и велию милость.
Песнь 4
Ирмос: Услышах, Господи,/ смотрения Твоего таинство,/ разумех дела Твоя,/ и прославих Твое Божество.
Светлое твое торжество, светом сияющее Божия Духа, озаряет души наша верою поющих тя, Елено преподобная.
Чудесы божественными уверила еси неведущих Владыку, и к познанию Его возвратила еси, прелести тьму оставлыпих.
Дары Христу принесла еси, чистое умерщвление удов, и труды воздержания: и протйву прияла еси Небесное Царство и вечнующее наслаждение.
Богородичен: Радуйся, теплая Ходатаице о живущих в Четвертом Жребии Твоем; радуйся, милость Сына Твоего до скончания века месту сему обещавшая; радуйся, радосте и спасение душ наших.
Песнь 5
Ирмос: Утренююще вопием Ти,/ Господи, спаси ны:/ Ты бо еси Бог наш,/разве бо Тебе иного не вемы.
Руце твои преподобно воздвизаеми к Зиждителю, мати Елено, низложиша вражия шатания.
Удержав руку твою десную Вышний, наставил тя есть, мати, к небесному Своему наслаждению.
Стезю тесную прошедши в пощении, к широте приспела еси райстей, Елено, всечестная.
Богородичен: Радуйся, Дево, яко благословением Твоим осени Дивеево сила Вышняго; радуйся, яко обитель Твоя наполнишася подвизающимися; радуйся, яко просия зде множество преподобных, молящихся о спасении душ наших.
Песнь 6
Ирмос: Ризу мне подаждь светлу,/ одеяйся светом яко ризою,/ Многомшостиве Христе Боже наш.
Умертвивши двизания плотская, над страстьми вельми воцарилася еси, и ныне, всечестная Елено, в безстрастных живеши светлостех.
Образу Спасову навыкла еси покланятися, славная, делы и словесы твоими спасительная Его соблюдающи учения.
Облак тя Христос показа, мати Елено, дождь источающий животный, верою просящим у тебе преславная.
Богородичен: Радуйся, яко на наследие Твое присно призираеши; радуйся, яко благодати и милости Своея сподобляеши нас; радуйся, благословение Сына Твоего на нас низводящая.
Кондак, глас 5
В монашестве благочестно поживши/ и в юных летех путь свой скончавши,/ послушанием, постом и молитвою вечно-неразлучною/ к сретению Жениха себе предуготовившая,/ богомудрая Елено, молим тя:/ от бед избави нас/ твоими молитвами, блаженная.
Икос
Струи мне слова даждь, Боже мой, и источник благочиния сотвори мой ум, и благослови язык мой, да воспою Твою агницу, юже венчал еси Ты благостию Твоею: аще бо Сам не даси ми слова достойнаго, како принесу дар нищий богатней в словесех и деяниих; тем подаждь ми силу, исповедати ея натрижнения, крепко бо звери победила есть: но молитвами ея противных шатания разори.
Песнь 7
Ирмос: Отроцы еврейстии в пещи/ попраша пламень дерзновенно,/ и на росу огнь преложиша, вопиюще:/ благословен еси Господи Боже, во веки.
О доброте тлеющей, преподобная небрегла еси, смотряющи тамо сущая воздаяния и свет, и славу Божию нестареющуюся и красоту, и божественное селение.
Мир пременила еси тлеющий премирным животом нестареющим, и временную пищу пребывающим существом, и плотским обручником, Небеснаго Жениха.
Разум боголюбив стяжала еси, Елено славная, с плотию ангелом уподобилася еси, бдящи тепле любовию, и поющи: благословен еси, Господи Боже, во веки.
Богородичен: Радуйся, всяких даров рабом Твоим Всещедрая Подательнице; радуйся, во брани, в болезнех и трудех их премилосердая Утешительнице; радуйся, надеждо и спасение душ наших.
Песнь 8
Ирмос: Богоглаголивии отроцы в пещи,/ со огнем пламень попирающе, пояху:/ благословите дела Господня Господа.
Украшена сиянием чистоты и чистым житием просвещена мати, предстоиши Жениху твоему Христу Богу нашему.
Господа лицезрети сподобилася еси, преподобная Елено, видевши Его яко огнь неизреченный, и в Небесное Дивеево прежде кончины Самою Пречистою Девою введена была еси.
Священна жертва принеслася еси и приношение светлое, преподобная мати Елено, яко кадило благоуханное, всех Владыце Христу Богу нашему.
Богородичен: Радуйся, Хранительнице наша в настоящем веце; радуйся, Предстательнице и непостыдное упование в будущем; радуйся, прилог всякаго зла от жребия Своего последняго отражающая.
Песнь 9
Ирмос: Устрашися всяк слух неизреченна Божия снисхождения,/ яко Вышний волею сниде даже и до плоти,/ от девического чрева быв человек:/ тем же Пречистую Богородицу вернии величаем.
Возжелела еси доброту мысленную Жениха и чисто возлюбила еси Его. Где почиваеши; где ли пасеши; тепле вопияла еси: да почию у Тебе и в Твоих светлостех наслаждуся, величающе Твою благость.
Разум имела еси в твоей души, и смирение, и божественную кротость, веру несумненну, и надежду и любовь, юже к Богу: всенощными молитвами приближающися Ему, и тамо сущими светлостьмй, блаженная Елено, озаряема и просвещаема.
Собрашася днесь людие, хвалами возвеличите Г оспода, возвеличившаго твое святое торжество сие: в немже поминай нас поминающих тя, предстоящи Христу Жениху твоему, преподобная Елено, и всечестная.
Богородичен: Песни благодарственный вси мы в обители сей святой живущии приносим Ти, Мати Божия, яко спасаеши нас присно от всякаго обстояния, питаеши, устрояеши и о нас промышляеши. Но молим Ти ся, и Божественнаго Царствия по кончине нашей сподоби нас.
Светилен, Подобен: «Чертог Твой».
Радуйся, Дивеевская обитель славная, молитвенницу имущи просиявшую в тебе преподобную матерь Елену вкупе с преподобными Александрою и Марфою, днесь о нас молящихся прилежно избавитися нам муки вечныя.
Богородичен: День мне возсияй разумнаго веселия, Ты бо еси, Чистая, свет, и живот сущих во тьме: хотению бо мощна еси, и еже творити ймаши яко сущи всех Владычица, избави всех от бед, и всех скорбящих от соблазн лукаваго.
На хвалитех стихиры, глас 8.
Подобен: «О преславнаго чудесе».
О преславнаго чудесе! Житие твое чудно явися,/ преподобная мати наша Елено,/ воистинну и кончина твоя чудесна,/ юже и за повеление от старца Серафима прияла еси,/ любве истинныя показующи познание и послушания совершеннаго исполнение,/ всем благодарение смиренно воздавала еси,/ упование на милосердие Г оспода возлагающи,/ Егоже моли даровати нам велию милость.
О преславнаго чудесе! Царствия несказанный свет/ осия тя, всеблаженная,/ егда величественная Всецарица показа ти Небесное Дивеево,/ ты же пред кончиною прилежно молилася еси, взывающи со слезами: Святая Игумение, обитель нашу не остави/ и, яко преставившись к чертогам световидным,/ нетленным венцем украшена, нас не забуди, преподобная Елено,/ моли даровати нам велию милость.
Дивных откровений и видений славная причастница,/ тайнам служительница Небесным, Елено, явилася еси,/ яко Огнь Неизреченный узрела еси Господа,/ а Царицу и святых ангелов просто,/ радуются Херувимы, Серафимы и вся Небесныя силы,/ зряще праведную душу на Небо возносиму,/ представляему ко Престолу Животворящей Троицы/ и сочетоваему с лики преподобных и праведных,/ с нимиже моли даровати нам велию милость.
Светло днесь обитель Дивеевская украшается,/ имущи твоя мощи, неоскудеваемую благодать исцелений источающия,/ песненными похвалами венчает тя, зовущи:/ о, преподобная мати наша Елено,/ великий союз духовный имея с преподобными Александрою и Марфою,/ и якоже обретение честных мощей ваших во едино бе время,/ с нимиже и вкупе с преподобным Серафимом/ в Небесных обителех моли за обитель твою земную,/ вечную радость даровати нам и велию милость.
Слава, глас 3
Тихостию нрава направляемая,/ в тихое пристанище достигла еси,/ преподобная мати наша Елено,/ смиренномудрия ради удобно избежавши сопротивных сетей,/ святою душею твоею на Небеса возлетевши,/ яко голубица чистая,/ идеже, Христу предстоящи, моли спастися нам,/ почитающим святую память твою.
И ныне, праздника:
На литургии:
Блаженны праздника и прп. Елене песнь 6
Прокимен, глас 4: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Апостол к Галатам, зач. 208
Аллилуиа, глас 1: Терпя потерпех Господа, и внят ми и услыша молитву мою.
Евангелие Матфеа зач. 104
Причастен: В память вечную будет праведник.
Молитва
О, преславная мати, скорая наша помощнице и заступнице и неусыпная о нас молитвеннице! Предстояще раце мощей твоих и на сия со умилением, яко живей ти сущей, взирающе, молимся тебе усердно: приими прошение наше и принеси я ко престолу милосердаго Отца Небеснаго; яко дерзновение многое к Нему имущая: испроси притекающим к тебе и всем православным христианом вечное спасение и временное благоденствие, на вся же благая дела и начинания наша щедрое благословение и от всяких бед и скорбей скорое избавление. Ей, чадолюбивая мати наша! Тебе, предстоящи престолу Божию, ведомы суть нужды наши духовные и житейские: призри на ня матерним оком, и твоими молитвами вся злая от нас отврати, паче же злых и богопротивных обычаев умножение: утверди же во всех веры согласное ведение, взаимную любовь и единомыслие, да во всем житии нашем, словесы же и писании и дёлы, славится всесвятое имя Отца и Сына и Святаго Духа, Единаго Бога, в Троице покланяемаго, Ему же честь и слава во веки веков.

Добавить комментарий

Ваш e-mail не будет опубликован. Обязательные поля помечены *