Икона Всех Дивеевских Святых
Месяца июня в 14-й/27-й день.
Всех святых, в земли Дивеевстей просиявших.
НА МАЛОЙ ВЕЧЕРНИ
На Господи, воззвах: стихиры святых на 4, глас 5:
Небо звездами, Владыко, украсивый/ и Твоими святыми всю землю просветивый/ увенчал еси всечестный собор всех дивеевских святых/ Тебе возлюбивших и всем сердцем Тебе взыскавших,/ Твоей же Пречистей Матери неослабно послуживших,/ иже не престают милостивно пещися о рабех своих,/ светолучными сиянии чудотворений озаряюще,/ многоразличных обстояний избавляюще,/ сокрушенным сердцам отраду подающе,/ ихже тепле просим:/ о святии, помолитеся о нас,// чтущих любовию святую память вашу. (Дважды)
Множество звезд, Вседержителю, исчитавый,/ и всем им имена нарицавый,/ всех святых в земли Дивеевстей просиявших,/ ихже имена Ты, Господи, веси,/ се приял еси в Царство славы несказанныя,/ священники Твоя облекл еси во спасение,/ и преподобнии Твои возрадовашася./ Сего ради и мы ходатаев небесных просим:/ О угодницы Божии, прилежно молитеся/ усердно нам Богу угождати,/ веру соблюсти православную,/ от бед отечеству нашему избавитися/ и всем верным спастися,// величающим любовию святую память вашу.
Глас 4:
Преподобне отче Серафиме,/ любовию к Богу распалаяся,/ тленная вся оставил еси/ и избранник возлюблен Божия Матере явился еси,/ об обители Ея попечение отеческое имея,/ по благословению и воли Ея вся устроял еси,/ неизреченных таин откровение приемый./ О старче дивный и богомудрый!/ истинный наставниче на путь спасения,/ учителю любве и целомудрия,/ Дивеево дивное тобою ныне славится/ и святая твоя рака обитель украшает,/ к нейже яко к самому тебе живу сущу припадаем/ просяще согрешений прощения:/ не забывай нас, радосте наша// Серафиме, преподобне отче наш.
Слава, глас 2:
Днесь Церковь Русская ликует/ и прославляет собор всех Дивеевских святых,/ во времена различна во обители поживших,/ во всяцем чине и звании подвиги добрыми подвизавшихся,/ знаемых купно и незнаемых/ ихже имена написашася в книзе жизни./ Подобаше во единем месте Господеви угодившим/ во един день светло праздновати,/ ихже предстательством и Владычицы Девы Богородицы Покровом/ отечество и обитель нашу в мире сохрани// Многомилостиве Христе, Боже наш.
И ныне, Богородичен, глас тойже:
Все упование мое на Тя возлагаю,/ Мати Божия,// сохрани мя под кровом Твоим.
На стиховне стихиры, глас 2:
Подобен: Егда:
Егда яко звезды светом добродетелей сияющия,/ озарили есте блистанием чудес вси концы Русския земли/ преподобныя матери наша Александро, Марфо и Елено,/ Царице Небесней верно послужившия,/ тогда место подвигов ваших небо другое показали есте,/ и ныне память ваша согревает верных сердца/ усердно молящих вас: помяните нас, госпожи и матери наша// у Престола Божия во Царствии Небеснем.
Стих: Дивен Бог во святых Своих,/ Бог Израилев.
Егда яко злато в пещи искушений сияющия,/ святыя блаженныя матери наша Пелагие, Параскево и Марие,/ шествовали есте тесным путем/ отвергшася себе и крест на рамо вземша,/ тогда светом божественной мудрости просвещаемыя,/ велия подвиги молитвенныя и постныя труды понесли есте,/ и кто исповесть смирение, незлобие, терпение ваше?/ Помяните чад своих зовущих вам любовию:/ радуйтеся, наши теплыя предстательницы и покровительницы.
Стих: Святым, иже суть на земли Его,/ удиви Господь вся хотения Своя в них.
Глас 8:
Подобен: О, преславного чудесе:
Приидите, вернии, согласно восхвалим/ Церкве Христовы непоколебимое утверждение,/ Царицы Небесныя славное ополчение/ мученика священна и святителя всечестна Серафима,/ двоицу иереев Михаила и Иакова/ похвалу священства и пастырей истинных,/ жертвенник красен свое сердце сотворивших,/ священную ризу кровьми обагривших,// ихже ради подвигов, Всесильне Спасе, помилуй нас.
Слава, глас и подобен тойже:
О преславнаго чудесе!/ Стопам последующе древних мученик,/ твердым веры исповеданием/ гонений и страданий крепким терпением/ преподобномученицы Пелагие и Марфо/ и преподобноисповеднице Матроно,/ светом крестных луч осияваемыя,/ венцем победы увенчалися есте всеблагославно,// ихже ради подвигов, Всесильне Спасе, помилуй нас.
И ныне, Богородичен: Владычице, приими молитвы:
Тропарь писан на велицей вечерни.
НА ВЕЛИЦЕЙ ВЕЧЕРНИ
Блажен муж: 1-й антифон. На Господи, воззвах: стихиры на 8, глас 1:
Подобен: О, Дивное чудо:
О, дивное чудо!/ Всенепорочная Мати Света,/ избравши в жребий Свой обитель Дивеевскую,/ благия обетования о ней изрекла еси,/ Божия благословения и милости Своя богатыя являющи,/ да любовию Тебе благодарственно воспеваем:/ Благодатная, радуйся, с Тобою Господь,// подаяй мирови Тобою велию милость.
Дивны Твоя тайны, Богородице,/ по слову неложнаго обетования/ обитель Твою присно посещаеши,/ божественными сиянии ангельских воинств обступаема,/ и чины всех святых земли Дивеевския прославляема,/ да и мы с ними Тебе любовию воспеваем:/ Благодатная, радуйся, с Тобою Господь,// подаяй мирови Тобою велию милость.
О, дивное чудо!/ Благословенная обитель Дивеевская/ четвертым Уделом Божия Матере нарицается,/ и в нейже сонм святых бывает,/ яко цвети честнии благовоннии,/ многоплодие добродетелей принесше,/ земли Русстей явльше славу велию,/ к ним припадаем зовуще тепле:/ о угодницы всехвальнии/ Господеви молитеся// даровати душам нашим мир и велию милость.
Глас 2:
Подобен: Киими похвальными венцы:
Киими похвальными добротами/ ублажим преподобнаго Серафима?/ Повелений Царицы Небесныя вернаго исполнителя,/ обетованныя Ею обители устроителя и попечителя,/ сестер Дивеевских отца чадолюбиваго и духовнаго окормителя./ И всем помощника скораго и в скорбех утешителя,// и молитвенника теплаго о душах наших.
Киими вдохновенными песньми/ воспоем преподобныя жены Дивеевския?/ Александру, Божия Матере избранницу/ и Ея Четвертаго Удела во вселенней первоначальницу;/ Марфу, отроковицу ангелоподобную,/ преподобнаго Серафима откровений сотаинницу;/ Елену, кротости, смирения и воздержания образ,/ даже до смерти совершенную послушницу;// молитвенниц теплых о душах наших.
Киими похвальными словесы/ возвеличим Пелагию, Параскеву и Марию блаженных?/ Разделенныя телесы и ко Господу духом горящим совокупленныя,/ странниц земных, взыскующих Отечества горняго,/ причастниц звания небеснаго,/ миру юродивых, обаче мудрых Христу,// Егоже молите о душах наших.
Киими достойными похвалами/ увенчаем священномучеников земли Дивеевския?/ Серафима, града святаго Петра архипастыря многострадальнаго,/ Иакова и Михаила, иереев благоговейнейших,/ столпов непоколебимых Церкве Православныя,/ новозакланных агнцев,/ обители Дивеевския славу и украшение,// и молитвенников теплых о душах наших.
Кии неизреченныя дары/ принесем по достоянию новомученицам и исповедницам земли Дивеевския?/ Марфе и Пелагии, инокиням честным и агницам Христовым,/ Матроне преподобней, имене Его Святаго исповеднице твердейшей,/ мученицам Пузовским Евдокии, Дарии, Дарии и Марии,/ первым христианом страдании подобницам,/ верным ученицам Господа нашего Иисуса Христа,// Егоже молите ныне о душах наших.
Слава, глас 4:
Днесь наста солнца светлейший праздник/ собора святых Дивеевских,/ верныя к веселию созывает,/ и лучами радости всех просвещает./ В них бо явися слава Христова,/ слава Церкве Православныя,/ дивными сияющи чудесы;/ темже, вернии, любовию вопием:/ молитеся за ны ко Господу,// святии вси, в земли Дивеевстей просиявшии.
И ныне, Богородичен, глас тойже: Иже Тебе ради:
Вход. Прокимен дне. И чтения три.
Пророчества Исаиина чтение (глава 43):
Тако глаголет Господь:/ вси языцы собрашася вкупе,/ и соберутся князи от них,/ кто возвестит сия в них?/ Или, яже от начала, кто слышана сотворит вам?/ Да приведут свидетели своя и оправдятся,/ и да услышат, и да рекут истину./ Будите Ми свидетели,/ и Аз Свидетель, глаголет Господь Бог,/ и отрок, егоже избрах,/ да познаете и веруете Ми, и разумеете, яко Аз есмь;/ прежде Мене не бысть ин бог и по Мне не будет./ Аз есмь Бог, и несть, разве Мене, спасаяй./ Аз возвестих и спасох, уничижих, и не бе в вас чуждий./ Вы Мне свидетели, и Аз Господь Бог./ И еще от начала Аз есмь,/ и несть от рук Моих избавляяй;/ сотворю, и кто отвратит то?/ Сице глаголет Господь Бог,/ избавляяй вас Святый Израилев.
Премудрости Соломоновы чтение (глава 3):
Праведных души в руце Божией,/ и не прикоснется их мука./ Непщевани быша во очесех безумных умрети,/ и вменися озлобление исход их,/ и еже от нас шествие — сокрушение,/ они же суть в мире./ И́бо пред лицем человеческим аще и муку приимут, / упование их безсмертия исполнено./ И вмале наказани бывше, великими благодетельствовани будут,/ яко Бог искуси я и обрете их достойны Себе./ Я́ко злато в горниле, искуси их/ и, яко всеплодие жертвенное, прият я./ И во время посещения их возсияют/ и, яко искры по стеблию, потекут./ Судят языком и обладают людьми,/ и воцарится Господь в них во веки./ Надеющиися Нань разумеют истину/ и вернии в любви пребудут Ему,/ яко благодать и милость в преподобных Его/ и посещение во избранных Его.
Премудрости Соломоновы чтение (главы 5 и 6):
Праведницы во веки живут, и в Господе мзда их,/ и попечение их у Вышняго./ Сего ради приимут царствие благолепия/ и венец доброты от руки Господни,/ зане десницею покрыет я и мышцею защитит их./ Приимет всеоружие рвение свое/ и вооружит тварь в месть врагом./ Облечется в броня правды/ и возложит шлем суд нелицемерен./ Приимет щит непобедимый преподобие,/ поострит же напрасный гнев во оружие,/ споборет же с ним мир на безумныя./ Пойдут праволучныя стрелы молниины/ и, яко от благокругла лука облаков, на намерение полетят, / и от каменометныя ярости исполнь падут грады./ Вознегодует на них вода морская,/ реки же потопят я нагло./ Сопротив станет им дух силы/ и, яко вихрь, развеет их,/ и опустошит всю землю беззаконие,/ и злодейство превратит престолы сильных./ Слышите убо, царие, и разумейте,/ навыкните, судии концев земли./ Внушите держащии множества/ и гордящиися о народех язык,/ яко дана есть от Господа держава вам/ и сила от Вышняго.
На литии стихира храма, таже святых, глас 1:
Блаженна еси, чудная обитель Дивеевская,/ славны вси пределы твои,/ стопами Пресвятыя Богородицы освященныя и подвиги святых прославленныя./ Ихже всехвальную память совершающе,/ славословим Христа Бога, Дивнаго во святых Своих,// и молимся спастися душам нашым.
Слава, глас тойже:
Небесных благ струи нетленныя/ цельбам источник приснотекущий,/ священная ваша мощи, о святии Дивеевстии,/ сиянием Святаго Духа осеняемыя,/ благоухают и душетленных страстей исцеляют// и напаяют сердца верных благодатию.
И ныне, Богородичен, глас тойже:
Всякое дыхание и тварь/ похваление Тебе приносит, Владычице;/ и инокини дивеевстии, заповедь преподобнаго Серафима хранящи,/ пред иконою святаго Умиления Твоего пение молебное возсылают:// Пресвятая Богородице, спаси нас!
На стиховне стихиры святых, глас 5.
Подобен: Преподобне отче:
Преподобная мати наша Александро!/ Явлением тебе Царицы Небесныя Дивеево дивно освятися/ и Четвертым жребием Ея наречеся./ Ты же многими труды и терпением/ в слезном покаянии основание обители положила еси/ и благодать Святаго Духа стяжавши/ ныне в Небесных чертозех ликуеши// и молишися о спасении душ наших.
Стих: Дивен Бог во святых Своих,/ Бог Израилев.
Преподобная мати наша Марфо;/ ангелоподобнаго жития твоего ради/ возлюбленною ученицею преподобнаго Серафима была еси,/ откровения о грядущей славе Дивеева от него приемлющи,/ и моление таинственное об основании Мельничныя обители совершающи,/ избрана на служение Царицею Небесною была еси,// Еяже моли о спасении душ нашых.
Стих: Святым, иже суть на земли Его,/ удиви Господь вся хотения Своя в них.
Преподобная мати наша Елено;/ ты отцу своему духовному преподобному Серафиму/ в простоте сердца повиновалася еси, яко Христу,/ смерть вместо брата за послушание приявши;/ паче бо сея любве никтоже имать,/ да кто душу свою положит за други своя, — глаголет Господь,// Егоже моли о спасении душ нашых.
Слава, глас 6:
Самодержавную волю свою/ в прославлении твоем, преподобне отче Серафиме,/ святый Царь Николай являет,/ тя, яко великаго угодника и чудотворца почитая,/ со святою царицею Александрою/ пред мощами твоими усердно молится;/ да Господь благость Свою на Русь Святую низпослет// даруя ей велию милость.
И ныне, Богородичен, глас тойже: Творец и Избавитель:
На благословении хлебов тропарь святых, дважды, и Богородице Дево: единожды.
Тропарь, глас 5:
Днесь церковная расширяются недра,/ приемлющи богатство Божия благодати/ и радуется Пресвятыя Богородицы избранная обитель,/ память совершающе многоименитаго лика святых,/ в Небеснем Дивееве торжествующих// и молящихся о душах наших.
НА УТРЕНИ
На Бог Господь: тропарь святых, дважды.
Слава, и ныне, Богородичен.
По 1-м стихословии седален, глас 4:
Днесь яко солнце незаходимое,/ возсия всечестная память собора святых, в земли Дивеевстей просиявших,/ равноангельным житием и мученическою смертию Богу угодивших,/ и дерзновение велие у Него стяжавших,// ихже молитвами, Боже, даруй нам велию милость.
Слава, и ныне, Богородичен:
Во храме Пресвятаго Рождества Твоего, Богородице, — усыпальнице мощей святых,/ немолчное славословие Господу возносится;/ и сим псалмопением непрестанным обитель Дивеевская обители «Неусыпающих» уподобилася есть.
По 2-ом стихословии седален, глас 6:
Днесь светло красуется обитель Дивеевская,/ и чада Церкве Христовы радуются,/ прославляюще собор святых, в земли сей просиявших,/ и ревностию ко спасению просвещаются, взывающе:/ молитвами, Господи, всех святых земли Дивеевския// спаси душы наша, яко Милосерд.
Слава, и ныне, Богородичен:
Егда в день празднования Пресвятаго Рождества Твоего, Владычице,/ обитель Дивеевская вестию скорбною о закрытии ея огласися,/ тогда Ты, Пречистая, под Свой Омофор взяла еси инокинь честных,// Скорая в бедах Помощнице.
Величание
Величаем вас,/ вси святии земли Дивеевския,/ и чтим святую память вашу,/ вы бо молите за нас// Христа Бога нашего.
Избранный псалом:
Господи, Господь наш,/ яко чудно Имя Твое по всей земли./ Мне же зело честни быша/ друзи Твои, Боже./ Изочту их,/ и паче песка умножатся./ Дивен Бог во святых Своих,/ Бог Израилев./ Святым, иже суть на земли Его,/ удиви Господь вся хотения Своя в них./ Блажени вси боящиися Господа,/ ходящии в путех Его./ Восхвалятся преподобнии во славе,/ и возрадуются на ложах своих./ Воспойте Господеви песнь нову,/ хваление Его в Церкви преподобных./ Соберите Ему преподобныя Его,/ завещающия завет Его о жертвах./ Веселитеся о Господе/ и радуйтеся праведнии./ Праведницы наследят землю/ и вселятся в век века на ней./ Многи скорби праведным,/ и от всех их избавит я Господь./ Милость же Господня от века и до века/ на боящихся Его./ И правда Его на сынех сынов, хранящих завет Его/ и помнящих заповеди Его творити я./ От восток солнца до запад/ хвально Имя Господне.
Слава, и ныне: Аллилуиа. Трижды.
По полиелеи седален, глас 4:
Иже в земли Дивеевстей прославльшиися,/ священномученицы, преподобнии, мученицы, исповедницы и блаженнии,/ подвиги своими Богу угодившии,/ и нетления и славы венцы украсившеися,/ Христа Бога нашего молите/ мир Церкви нашей даровати// и душам нашым спастися.
Слава, и ныне, Богородичен:
Многими содержими напастьми,/ во всякой скорби душевной и обстоянии к Тебе прибегаем,/ Пресвятая Богородице,/ молебное пение Тебе, по заповеди преподобнаго Серафима, приносящи:/ О, Мати Слова и Дево,// от тяжких и лютых ны спаси!
Степенна, 1-й антифон 4-го гласа.
Прокимен, глас 4: Дивен Бог во святых Своих,/ Бог Израилев.
Стих: В церквах благословите Бога, Господа от источник Израилевых.
Всякое дыхание: Евангелие от Матфея, зачало 11.
По 50-м псалме стихира, глас 6:
Церкве Христовы светильницы,/ всея России украшение,/ святии вси, в земли Дивеевстей просиявшии,/ Владыку всех молите/ мир вселенней даровати// и душам нашым велию милость.
Канон Богородицы со ирмосом на 6 (ирмосы по дважды, тропари на 4) и святых на 8. Глас 1.
Песнь 1
Ирмос: Твоя победительная десница,/ боголепно в крепости прославися:/ та бо, Безсмертне,/ яко всемогущая, противныя сотре,// израильтяном путь глубины новосоделавшая.
Припев: Вси святии Дивеевстии, молите Бога о нас.
Дивеево — Четвертый Удел Царицы Небесныя во вселенней — ныне ликует,/ прославляя собор святых своих, в земли сей просиявших,/ яко звезды украсивших небо Церковное подвиги земнаго жительства своего.
Из уст преподобныя Александры восприяв, яко завет духовный, попечение об обители Дивеевстей,/ во вся дни живота твоего сию окормлял еси, преподобне отче Серафиме,/ и доныне обета своего не нарушил еси,/ святыми мощми своими зде почивая.
Места подвигов молитвенных Саровскаго чудотворца посетив,/ любовию к нему возгорелся еси,/ священномучениче Серафиме,/ благословением блаженныя Параскевы летопись обители Дивеевския составил еси,/ и тако прославлению и обретению честных мощей преподобнаго Серафима пособствовал еси.
Чудотворцу Саровскому тезоименитый,/ мученическия кончины предречение от преподобнаго приял еси,/ обаче и утешения в видении от него сподобивыйся/ и ныне во Царствии Небеснем близ преподобнаго Серафима пребываеши.
Богородичен: Радуйся, Пресвятая Госпоже, освятившая Дивеево Твоим пришествием,/ радуйся, насадившая веру истинную, радуйся, собравшая монашествующих множество.
Песнь 3
Ирмос: Едине ведый человеческаго существа немощь,/ и милостивно в не воображься,/ препояши мя с высоты силою,/ еже вопити Тебе, Святый:// одушевленный храме неизреченныя славы Твоея, Человеколюбче.
Егда повеление Царицы Небесныя о Четвертем Ея жребии прияла еси, мати Александро,/ тогда абие на исполнение Промысла Божественнаго востекла еси,/ в пределе жительства твоего обители Дивеевстей начало положивши.
Храм Казанскаго явления Пресвятыя Богородицы в Дивееве устроивши,/ преподобная мати наша Александро,/ добродетельми и сама украсилася еси:/ смирением неисповедимым, слез источником непрестанным,/ молитвою к Богу чистейшею,/ любовию ко всем нелицемерною,/ и вельми великою и святою женою явилася еси.
Во Царствии Божием близ Царицы Небесныя со святыми девами предстоиши,/ Небеснаго Дивеева начальнице,/ великаго ангельскаго образа совершенства восприемнице,/ госпоже и мати наша Марфо,/ помяни нас у Престола Божия во Царствии Небеснем!
Свободну себе от обручника земнаго сотворивши,/ со светлою свещею души твоея, в сретение Небеснаго Жениха изшла еси, преподобная Елено,/ Емуже уневестившися, вся житейская оставила еси,/ и в чертог небесный с мудрыми девами прията быти сподобилася еси.
Богородичен: Радуйся, во Удел Себе Дивеево избравшая,/ радуйся, Заступницею места сего быти изволившая;/ радуйся, верным, пребывающим зде, Подательнице земных благ;/ радуйся, Споручнице вечнаго их спасения.
Седален, глас 1:
Яко звезды многосветлыя,/ на небе Церковнем просиявшия,/ подвигов добропобедных сиянием и чудес зарями/ всю землю Дивеевскую просветившии,/ вы бо Божественныя светлости явилися есте причастницы/ и блаженныя вечныя жизни показалися есте наследницы;/ темже всерадостную память вашу совершающе, верно вопием:/ святии вси земли Дивеевския,/ молите Христа Бога грехов оставление даровати/ чтущим с любовию святую память вашу.
Слава, и ныне, Богородичен:
Благословения Иверии, Афона и Киева на Четвертый Свой Удел излияла еси, Царице Небесная,/ и до днесь благодать Всесвятаго Духа Божия и обилие всех благ земных и небесных/ от места Твоего возлюбленнаго, по слову Твоему, не оскудевают.
Песнь 4
Ирмос: Гору Тя, благодатию Божиею приосененную,/ прозорливыма Аввакум усмотрев очима,/ из Тебе изыти Израилеву провозглашаше Святому,// во спасение наше и обновление.
Иже любит отца или матерь, сына или дщерь паче Мене, несть Мене достоин, — рече Господь,/ и иже не приимет креста своего, несть достоин Мене./ Ты же, блаженная мати Пелагие,/ вся домашняя своя оставльши, Господу твоему последовала еси,/ паче же и душу свою возненавидев,/ в Живот Вечный соблюла еси ю.
Ихже око не виде, и ухо не слыша, и на сердце человека не взыдоша, яже уготова Бог любящим Его;/ ты же, блаженная мати Параскево,/ вся сия сокровища высшия мудрости духовныя/ безумием Христа ради познала еси.
Се бо, глаголет апостол, есть Живот Вечный, да познаем Господа,/ се же и смерть — не разумети о нем;/ ты же, блаженная мати Марие,/ прежде жизни Жизнь Вечную наследовала еси,/ и прежде воскресения сию прияла еси,/ во еже пожертой быти безсловесия смерти, разума и познания жизнию,/ якоже святитель Димитрий Ростовский рече.
Дивен Бог во святых Своих,/ иже тленная в нетление Прелагающий/ и мертвенная в безсмертие Облекающий,/ святыя мощи ваша нам Являющий,/ блаженныя матери наша Пелагие, Параскево и Марие,/ яко многоценное сокровище, в земли сокровенное,/ во образ грядущаго всеобщаго воскресения.
Богородичен: Радуйся, теплая Ходатаице о живущих в Четвертом Жребии Твоем;/ радуйся, милость Сына Твоего до скончания века месту сему обещавщая;/ радуйся, радосте и спасение душ наших.
Песнь 5
Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего богоразумия,// православно поющих Тя.
Яко злато в горниле Бог искуси тя и обрете достойну Себе, преподобномученице Марфо честная,/ и яко всеплодие жертвенное прият тя./ Ибо пред лицем человеческим аще и муку прияла еси,/ упование твое безсмертия исполнено,/ и вмале наказана бывши, великими облагодетельствована еси на Небесех.
Телом умерщвлена была еси, преподобномученице Пелагие,/ мучение смертное от рук богоборцев приявши,/ обаче духом низложила еси демонов немощныя дерзости,/ и во страдании своем венец прияла еси нетленный от Христа Бога нашего.
Иже аще исповесть Сына Божия пред человеки на земли,/ и Господь на Небеси исповесть того пред ангелы Своими;/ ты же, преподобная Матроно, исповеднице,/ добрым подвигом веры подвизалася еси,/ и исповедала еси доброе исповедание пред многими свидетели.
Преподобномученицы Марфо и Пелагие,/ и Матроно, исповеднице славная,/ вами естество женское возрадовася:/ несть бо ныне мужеский пол, ни женский,/ но всяческая и во всех Христос Бог,/ богат Сый во всех призывающих Его.
Богородичен: Радуйся, Дево, яко благословением Твоим осени Дивеево сила Вышняго;/ радуйся, яко обитель Твоя наполнишася подвизающимися;/ радуйся, яко просия зде святых множество, молящихся о спасении душ наших.
Песнь 6
Ирмос: Обыде нас последняя бездна,/ несть избавляяй,/ вменихомся, яко овцы заколения./ Спаси люди Твоя, Боже наш:// Ты бо крепость немощствующих и исправление.
Владимирския земли обители настоятельство приемши,/ житие преподобнаго Евфимия Суждальскаго составил еси, священномучениче Серафиме;/ егда же тя Господь на архиерейство земли Тверския призва,/почитание святыя благоверныя княгини Анны Кашинския утвердил еси,/ на благо Церкве Русския вельми послуживши.
Отрасле пречестная благочестиваго корене, священномучениче Михаиле,/ священства сан наследственно от отца своего приял еси,/ верности Богу и благочестию того последуя,/ и единокровнаго брата твоего тождестрадальник явился еси,/ с нимже молися о душах наших.
Прехвальне священномучениче Михаиле,/ Архистратигу Небесных Сил тезоимените;/ кто яко Бог? — богоборцем взывал еси,/ ангелов началовождя и поборника дерзновение стяжавши.
Любовию к чину монашескому преисполненный,/ дом свой аки обитель для всех труждающихся и обремененных сотворил еси, священномучениче Иакове,/ Авраамле страннолюбие показуя,/ и Иаковле чадородие духовне приемля,/ сего ради мзда сиих патриархов на Небесех тебе даровася.
Богородичен: Радуйся, яко наследие Твое присно призираеши;/ радуйся, яко благодати и милости Своея сподобляеши нас;/ радуйся, благословение Сына Твоего на нас низводящая.
Кондак, глас 8:
Троицы сосуди явистеся честным вашим житием/ и Пресвятыя Богородицы послушницы,/ вси святии в земли Дивеевстей просиявшии,// помяните нас у Престола Божия во Царствии Небеснем.
Икос:
«Аз есмь Лоза, вы же — рождие», — / глаголет Христос Бог Своим учеником./ Такожде и вы, святии вси земли Дивеевския,/ явистеся в вертограде Небеснем рождие лозы Христовы,/ благоукрасивше Святую Церковь Русскую плоды веры и благочестия,/ и ныне подаете душам нашым/ вино неисчерпаемыя благодати,// мир и велию милость.
Песнь 7
Ирмос: Авраамстии отроцы в пещи Троицу прообразивше,/ огненный пламень на росу преложиша,/ и поюще вопияху:// благословен еси, Боже отец наших.
Тезоименная благоволению Божию, мученице Евдокие блаженная,/ николиже попечения, по заповеди, имела еси душею твоею, что ясти или что пити, ни телу своему, во что облещися./ Взыскала бо еси прежде Царствия Божия и правды его,/ и сего ради благоволение обрела еси у Господа Бога отец наших.
Единеми имены в Крещении нареченнии, Дарии, страстотерпицы Пузовстии,/ во единем возрасте четырех десятиц мученическую смерть прияли есте,/ по имени* своему и житие совершивши;/ ибо немощни сущи плотию, сильни Богу явистеся,/ верою победивше безбожия царствия и обетование приемши наследия Царствия Небеснаго./ Побеждающему бо дам сести на Престоле Моем,/ — рече Господь Бог отец наших.
* имя Дария означает «сильная», «побеждающая»
Святителя Николая заступничеством исцеление от недуга получивши, мученице Марие,/ и к блаженной Евдокии пришедши/ ейже до конца жизни своея послужила еси ради Христа,/ Господа Бога отец наших.
Тридневная избиения и смерть лютую претерпевши/ славныя мученицы Пузовстии,/ стопам последующи Подвигоположника Христа,/ велиим гласом взывали есте:/ Тебе ради, Женише наш, ищущи страдальчествуем,/ и распинаемся и спогребаемся крещению Твоему/ и страждем и умираем Тебе ради,/ да и живем с Тобою, Господем Богом отец наших.
Богородичен: Радуйся, всяких даров рабом Твоим Всещедрая Подательнице;/ радуйся, во брани, в болезнех и трудех их премилосердая Утешительнице;/ радуйся, надеждо и спасение душ наших.
Песнь 8
Ирмос: В пещи отроцы Израилевы,/ якоже в горниле/ добротою благочестия чистее злата блещахуся, глаголюще:/ благословите, вся дела Господня, Господа// и превозносите во вся веки.
Была еси зело нищелюбива, мати наша Александро,/ сирот и вдовиц питательница,/ обаче милостыню ти тайно, по заповеди, творящу,/ да не увесть шуйца твоя, что творит десница твоя,/ и Видяй тайная благодеяния твоя,/ воздал есть тебе яве Отец наш Небесный,/ Сущий над всеми Царь во вся веки.
О, послушание!/ Ты соделало еси Бога Человеком, и человека богом соделоваеши, якоже святии отцы глаголют./ Образ сего послушания богоподобнаго приимши, мати наша Марфо,/ и по смерти к молениям нашым вельми послушлива являешися,/ и сим истину, отцы реченную, утверждающи,/ яко не умирает послушание во вся веки.
Голубкою тебе быти повелевая преподобный Серафим,/ госпоже и мати наша Елено,/ терпению, смирению, кротости и чистоте голубиней тя научал есть,/ да сими добродетельми ко иноческому житию себе приуготовиши,/ и тако спасеши душу свою во вся веки.
Троичен: Узреша вси над храмом Троицы Живоначальныя/ горличищ белых триех и триех еродиев в небеси над крестом парящих;/ сим знамением чудным яви Святая Троица Свое благоволение на освящение собора во славу Пресвятаго Имене Своего.
Богородичен: Радуйся, Хранительнице наша в настоящем веце;/ радуйся, Предстательнице и непостыдное упование в будущем;/ радуйся, прилог всякого зла от жребия Своего последняго отражающая.
Песнь 9
Ирмос: Образ чистаго Рождества Твоего/ огнепалимая купина показа неопальная;/ и ныне на нас напастей/ свирепеющую угасити, молимся, пещь,/ да Тя, Богородице,// непрестанно величаем.
Преславнии священномученицы Серафиме, Михаиле и Иакове/ честною кровию вашею/ ризы священства обагрили есте/ и древняго запинателя смертию своею низложили есте.
Преподобномученицы Пелагие и Марфо славныя/ смерти Христа ради себе безбоязненно предасте,/ не смотряющим вам видимых, но невидимых:/ видимая бо страдания временна,/ невидимая же слава вечна,/ тако рекли есте.
Преподобническим житием украсилася еси/ и Христа Бога исповеданием твердым,/ мати наша Матроно,/ в заточения отсылаема и на горькия работы изгоняема,/ в терпении мнозе, в скорбех, в бедах, в теснотах пребывши,/ сего ради на небесех обрела еси мзду трудов твоих.
Разделенныя телесы, но ко Господу духом горящим совокупленныя,/ странницы земныя, взыскующия Отечества Горняго,/ Пелагия, Параскева и Мария блаженныя,/ достойныя преемницы преподобнаго Серафима во обители Дивеевстей явилися есте.
Богородичен: Песни благодарственныя вси мы в обители сей святей живущии приносим Ти, Мати Божия,/ яко спасаеши нас присно от всякого обстояния,/ питаеши, устрояеши, о нас промышляеши./ И молим Ти ся:/ Божественнаго Царствия по кончине нашей сподоби нас.
Светилен, глас 5:
Радуйся, земле Дивеевская славная,/ небесныя заступники имущи, вся святыя, в тебе просиявшыя,/ днесь светло праздник их совершающе,/ почитаем собор их.
Слава, и ныне, Богородичен:
Верховной Игуменией обители Дивеевския быти обещалася еси, Пречистая Дево,/ яко звезды небесныя и яко песок морский умножая зде Господу служащих,/ и Тя Приснодеву, Матерь Света, и Сына Твоего величающих.
На хвалитех стихиры на 4, глас 5.
Радуется весь ангельский собор,/ явися бо во стране Дивеевстей обитель Троицы Нераздельныя,/ от неяже произыде благолепный лик святых,/ в различныя лета различныя подвиги понесших,/ Единому же Господу послуживших,/ волю Царицы Небесныя верно исполнивших,/ преподобного Серафима заповеди свято соблюдших,/ к нимже верою и любовию зовем:/ Радуйтеся, обители нашея честный покров и заступление,/ в бедах поможение, в болезнех врачевание,/ обуреваемых тихое пристанище,/ солнца разсуждения, источницы умиления,/ любовию своею нас согревающии и милости многия низпосылающии,// во спасение душ наших.
Радуйся обитель Дивеевская, торжествующи,/ преславный сонм святых дивно украси Тя,/ верных раб и мудрых, евангельски Христу последовавших,/ тии бо нищии духом сокровищами небесными обогатишася,/ плакавше, источник слез и покаяния имущи,/ благодати Утешителя Духа исполнишася,/ кротостию нрава землю кротких наследоваша,/ алчуще и жаждуще правды Божия достойно насытишася,/ за милость помиловани быша,/ и яко чистии сердцем чисто зрят Святую Троицу,/ миротворивше любве истинныя показуют познание/ в преискреннем ближним служении,/ темже и божественнаго сподобишася сыноположения,/ изгнани правды ради и мучимы блаженство улучиша,/ вечную славу, покой и красоту несказанную,// и молятся о спасении душ наших.
Светися, Церковь Божия, крестными зарями/ чада бо Твоя святии во обители Дивеевстей просиявшии,/ Живоноснаго Креста благодатию укрепляемии,/ ведуще Единаго Христа и Сего распята,/ сохраниша верность и любовь к Нему,/ страдания духовныя же и телесныя претерпеша доблественне,/ воины Христовы необоримии,/ нетленныя венцы восприяша,/ и радуются ныне в нареченный сей и священный праздник,/ во свете неизреченнем ликующе,/ ихже житию подражати потщимся,// во спасение душ наших.
Радуйся, дивный собор всех дивеевских святых,/ Христовою любовию связуемых,/ коль добро соединение ваше/ и коль красен и сладок общий сей ваш праздник,/ в немже общее хваление сице приемлете:/ радуйтеся красотою любве сердца наша украшающии,/ к долготерпению и мужеству призывающии,/ уверяюще, яко ничтоже возможет разлучити от любве Христовы,/ и ныне Престолу Божию во славе предстояще,/ молитеся и нам любве исполненным быти,/ во еже не себе угождати, но ближним послужити// во спасение душ наших.
Слава, глас 2:
Красуйся ныне, Дивеевская земле/ принесшая Христу Богу благодатию просиявших в тебе:/ священномучеников славных — пастырем украшение,/ преподобных отец и матерей — Ангелом сожителей,/ новомучениц и исповедниц — мучеников славу и похвалу,/ блаженных — незлобивым цвет благоуханный.// Ихже молитвами, Христе Боже, помилуй нас.
И ныне, Богородичен, глас тойже:
Все упование мое на Тя возлагаю,/ Мати Божия,// сохрани мя под кровом Твоим.
Славословие великое. Ектении и отпуст.
НА ЛИТУРГИИ
Блаженны от канона святых, песни 3-я и 6-я на 8.
Прокимен, глас 4: Дивен Бог во святых Своих,/ Бог Израилев.
Стих: В церквах благословите Бога, Господа от источник Израилевых.
Апостол ко Евреем, зачало 330. Конец: Взирающе на Начальника веры, и Совершителя Иисуса.
Аллилуия, глас 4:
Воззваша праведнии, и Господь услыша их, и от всех скорбей их избави их.
Стих: Многи скорби праведным, и от всех их избавит я Господь.
Евангелие от Матфея, зачало 11.
Причастен: Радуйтеся, праведнии, о Господе, правым подобает похвала.
На запричастном: песнопения Пресвятей Богородице, святым и стихира, глас 3:
Града Москвы святителю Филарете,/ церковное светило, уста златозарная,/ и преподобне Антоние, игумене Радонежский,/ монашескаго жительства правило,/ достойно, яко миротворцев ублажаем вас/ истинных чтителей преподобнаго Серафима/ и обители Дивеевстей заступников теплейших,/ от нестроений и козней вражиих ея избавивших,/ вы, вкупе со святителем Феофаном, затворником Вышинским,/ попечение доброе о ней имели есте, и ныне, пастырие милостивии,/ от бед нас избавляете,/ напастей нечаемых восхищаете/ и присно Человеколюбца Бога умоляете// мир и единение нам даровати и велию милость.
Молитва собору святых в земли Дивеевской просиявших
О, всечестный соборе святых, в земли Дивеевстей просиявших, полче Божественный, подвиги своими в Царское победоносное ополчение возшедый! О святии, любовию ко Пречистей Деве Марии и Уделу Ея Четвертому совокупленнии, избранницы Царицы Небесныя и приснии Ея послушницы! Се ныне в день общаго вашего торжества приносим вам сие хвалебное пение.
Прославляем твоя великия чудеса, преподобне отче наш Серафиме, любимиче и собеседниче Владычицы нашея Пресвятыя Богородицы и всем прибегающим к тебе скоропослушный помощниче! Сохрани нас от прелестей мира сего лукаваго, да отвергшеся себе и вземше крест свой, последуем Христу, распинающе плоть свою со страстьми и похотьми, носящи тяготы друг друга.
Ублажаем ваше святое житие, преподобныя Александро, Марфо и Елено, начальницы обители Дивеевския, камень веры во основание ея положившия, терпением и мужеством до конца врага низложившия и нас от козней его избавляющия. Молитеся да дух вашея любве ко Господу и ревность о угождении Ему не оскудевает в нас.
Восхваляем вашу богоподражательную любовь, блаженныя Христа ради юродивыя матери наша Пелагие, Параскево и Марие, ибо посрамили есте премудрость века сего, возносящуюся на разум Божий. Помозите нам спасительным буйством Креста Христова утвердившеся, горняя присно, а не земная помышляти.
Величаем ваши великии подвиги, новомученицы и исповедницы преславнии Серафиме, Михаиле, Иакове, Пелагие, Марфо и Матроно, Евдокие, Дарие, Дарие и Марие. Споспешествуйте нам веру православную твердо содержати, да спасительное семя, вами всеянное, не изсушено будет зноем неверия, но плод изобильный да принесет.
О, святии сродницы наши! Не оставите чада ваша духовная, да в будущем веце услышим от вас блаженный глас ко Господу: се мы, и дети, яже дал еси нам, Господи! И, радующеся, купно с вами прославим Бога, в Троице покланяемаго, Отца, и Сына, и Святаго Духа, ныне и присно, и во веки веков.
Аминь.
Просмотры (353)
